Од:

Малезија го протерува амбасадорот на Северна Кореја

Малезија соопшти дека за персона нон грата го прогласила амбасадорот на Северна Кореја во земјата и дека му дала рок од 48 часа да си замине, пренесоа светските агенции. Ова следува три недели откако Ким Џонг-нам, полубрат на севернокорејскиот лидер Ким Џонг- ун, беше убиен на аеродромот во Куала Лумпур во напад со невротоксичен материјал.

Американски и јужнокорејски претставници изјавија дека Ким Џонг-нам бил убиен од агенти на севернокорејскиот режим.

Кан Чол, амбасадорот на Северна Кореја во Малезија, изјави дека неговата земја не може да му верува на начинот на кој малезиските власти ја водат истрагата за смртта на Ким Џонг-нам. Тој, исто така, ја обвини Малезија дека шурува со надворешни сили, премолчено упатувајќи на Јужна Кореја.

Малезискиот шеф на дипломатијата, Анифа бин Хаџи Аман, изјави дека Малезија побарала извинување од амбасадорот за неговите зборови, но дека тој тоа не го сторил.

-Малезија решително ќе реагира на секоја навреда, направена против неа, или на секој обид за нарушување на нејзината репутација, се наведува во изјавата на министерот.