Од:

Вимблдон: Федерер по осма титула, Чилиќ по успех на кариерата

Фото: wimbledon.com

Роџер Федерер против Марин Чилиќ очи во очи за титулата на 131. издание на Вимблдон. Машкото финале на централниот терен на „All England Club“ вредно 2,5 милиони евра е закажано за попладнево во 15 часот. За Швајцарецот ќе биде 11 во кариерата во Лондон во кое ќе атакува на деветти трофеј. Успее ли да победи, ќе стане апсолутен рекордер на третиот гренслем во сезоната, а воедно и највозрасен шампион. Хрватот, пак, ќе игра за прва титула на Островот, но и со желба да го повтори успехот на својот сонародник Горан Иванишевиќ од 2001 година.

„Пресреќен сум и горд на себе и мојот тим. Се чувствувам перфектно во последните неколку недели и играм навистина неверојатен тенис. Најважно е што на секој меч му пристапував позитивно, бев на одлично ниво во сите сегменти и тоа ме доведе до финале. Мислам дека и психолошкиот момент достигна високо ниво во овие два-три месеци. Сите натпревари што ги одиграв до Вимблдон ми дадоа сила и зрелост да донесам вистински одлуки во вистински моменти“, вели Чилиќ.

Фото: wimbledon.com

Билансот во досегашните седум пресметки на финалистите на Вимблдон е на страна на Федерер. Швајцарскиот тениски уметник има шест победи и еден пораз што го доживеа во полуфиналето на Ју-Ес опен во 2014 година, гренслем што Чилиќ подоцна и го освои. Двајцата играа и лани во четврт-финалето Лондон. Хрватот имаше водство со 2:0 во сетови и три меч топки во четвртиот сет меѓутоа 35 годишникот од Базел успеа да ги спаси и да направи пресврт.

„Да се игра против Федерер за титула на Вимблдон е, можеби, најголем предизик. Сепак, денешното финале е само еден меч за мене. Ќе бидам фокусиран на она што треба да го одработам на терен. Верувам во себе и своите можности и верувам дека можам да победам“, заклучи најдобриот хрватски рекет во моментот.

Многумина го гледаа Федерер како актер во големото финале, особено во одличниот кам-бек на тениската сцена на Австралија опен и Мастерс титулите што потоа ги освои во Индијан Велс и во Мајами. Но, малкумина негуваа оптимизам дека Швајцарецот ќе победи шест меча без загубен сет против Долгополов, Лајовиќ, Миша Зверев, Димитров, Раониќ и Бердих. За денешниот предизвик против Чилиќ ќе рече:

„Ме разби на Ју-Ес опен. Се надевам дека во финалето нема да одигра толку добро. Лани имав, исто така, тежок меч овде. Беше брутално. Марин имаше 2:0 во сетови, а јас морав да спасувам меч топки. Одличен човек е, одличен тенисер. Долго се познаваме и среќен сум што ќе игра финале. Го заслужи низ овие две недели“, порача Федерер.

Патот до финале на Вимбдлон 2017 на Роџер Федерер

Прво коло: Федерер – Долгополов (Украина) 6:3, 3:0 – Долгополов го предаде мечот

Второ коло: Федерер – Лајовиќ (Србија) 7:6, 6:3, 6:2

Трето коло: Федерер – М. Зверев (Герамнија) 7:6, 6:4, 6:4

Осминафинале: Федерер – Димитров (Бугарија) 6:4, 6:2, 6:4

Четврт-финале: Федерер – Раониќ (Канада) 6:4, 6:2, 7:6

Полуфинале: Федерер – Бердих (Чешка) 7:6, 7:6, 6:4

Патот до финале на Вимбдлон 2017 на Марин Чилиќ

Прво коло: Чилиќ – Колшрајбер (Германија) 6:4, 6:2, 6:3

Второ коло: Чилиќ – Маер (Германија) 6:4, 7:6, 7:5

Трето коло: Чилиќ – Џонсон (САД) 6:4, 7:6, 6:4

Осминафинале: Чилиќ – Баутиста Агут (Шпанија) 6:2, 6:2, 6:2

Четврт-финале: Чилиќ – Милер (Луксембург) 3:6, 7:6, 7:5, 5:7, 6:1

Полуфинале: Чилиќ – Квери (САД) 6:7, 6:4, 7:6, 7:5