Еден бронзен коњ помалку на скоскиот плоштад е доволно да се среди целата инфраструктура во Шипковица, изјави градоначалничката на Тетово, Теута Арифи одговарајќи на новинарско прашање за посетата на Груевски во Шипковица и тетовскиот регион.
Пред два дена, дел од граѓаните за време на посетата на претседателот на ВМРО-ДПМНЕ, Никола Груевски во Шипковица, се пожалија дека парите за штетата од поплавите од пред една година, се уште не се исплатени.
Груевски изјави дека Владата исплатила 25 милиони денари на Бирото за судски вештачиња, по што било утврдено дека се потребни уште 8-ипол милиони денари, кои подоцна биле исплатени на општина Тетово.
„Владата ја има извршено обврската, сега останатиот дел треба да се заврши преку општината“, рече Груевски, со што топката ја префрли на општина Тетово.
Теута Арифи пак, денеска ја префрли вината на Владата и рече дека општината ја завршила целата работа.
„Ние нашите обврски ги завршивме. Сега треба да се завршат обврските на Владата. Рековме дека имаме анализа и според нашите предвидувања треба да се инвестираат околу 20 милиони евра. Ова подразбира еден коњ помалку во Скопје и ќе се средат работите“, изјави Теута Арифи, пренесе ТВ21.
Таа јавно побара од Владата да се обезбедат 25 милиони евра за целосна санација на коритото на потокот и оштетената инфраструктура од поплавите.
„Ја направивме општата проценка за целосна санација и превенција од ризици и проектот ќе чини околу 25 милиони евра. Го испративме овој извештај до Владата и ја користам оваа прилика денеска да упатам јавен повик до Владата да ги обезбеди овие средства од заедничкиот државен буџет“, рече денеска Арифи.
Во поплавите во тетовскиот регион лани загинаа шест лица, дваесетина беа повредени и беше причинета голема материјална штета.