Новинарските екипи на А1он и ТВ 21 биле туркани, навредувани и им се заканувале додека се обидувале да го снимат езерото од фекалии кое настана во градилиштето спроти новата зграда на Министерството за надворешни работи, по вчерашниот пороен дожд.
Како што објавија овие два медиуми, екипите биле нападнати од лице кое не се легитимирало, притоа заканувајќи се дека ќе ги искрши и камерите.
Тој прво се обидел да ја бутне камерата на ТВ 21, потоа и снимателот на А1он. Потоа излегол и ги фотографирал двете екипи кои стоеле пред МНР, односно спроти земјиштето кое беше причина да се блокира целиот сообраќај.
За цело време додека траела оваа мешаница, како што објавија А1 он и ТВ 21 полицијата стоела на само десетина метри од местото и не интервенирала.
Лицето чиј идентитет не е познат тврдело дека се работи за приватно земјиште. А1 он објави дека се работи за државно земјиште дадено на фирма од Девствени острови која на тоа место треба да изгради зграда.