Владата на денешната седница донела одлука за почеток на процесот на исплата на целосната оштета за оштетените од августовските поплави, информираше портпаролот Александар Ѓорѓиев.
„Процесот на исплата на целосната оштета ќе се реализира во неколку транши. Согласно одлуката која е донесена денеска, во првата транша на исплати ќе следува исплата на оштетата за 947 предмети кои ќе добијат 100% од проценетата штета, за која што цел за овие 947 предмети се издвоени 118 милиони денари.
По наша проценка има околу 4000 предмети врз основа на кои треба да се исплати оштета, точниот вкупен број не е се уште утврден заради тоа што процесот на утврдување на точноста на секој предмет е се уште во тек, така да во оваа прва транша се опфатени приближно околу 25% од предметите. Значи, понатаму како што ќе се прочистуваат и комплетираат останатите предмети ќе следуваат нови транши на исплата на други домаќинства, исто така во висина од 100% од проценетата штета. Целиот овој процес би требало да заврши во период на месец октомври и ноември“, рече Ѓорѓиев.
Тој информираше дека досега се извршени авансни исплати од по 30 000 денари за 3074 предмети.
„Останатите, по проценка околу 1000 предмети нема да добијат авансна исплата туку веднаш ќе добијат комплетна оштета во висина од 100% од проценетата штета, односно кај овие предмети наместо во два чекора, авансна па комплетна исплата, процесот ќе оди во еден чекор директна комплетна исплата“, додаде Ѓорѓиев.
Оние пак кои добиле аванс од 30 илјади денари, на крајот ќе добијат 30 илјади помалку од вкупната сума на која е проценета штетата.
„На пример ако по основа на предмет била исплатена авансна исплата од 30000 денари, а вкупната проценета штета е 330 000 денари, сега по основ на тој предмет ќе бидат исплатени дополнителни 300 000 денари, затоа што 30 000 денари веќе добиле со авансот. Оние кои не добиле авансна исплата ќе добијат директно комплетна исплата на целата штета“, рече портпаролот на Владата.