Еврокомесарот Јоханес Хан во интервју за МИА во Брисел вели дека е уверен оти земјите членки на ЕУ пред летото ќе одобрат почеток на преговори со Северна Македонија.
Според него, земјава е апсолутно подготвена да ги почне преговорите, врз основа на резултатите и постигнатиот историски договор со Грција и Договорот за пријателство со Бугарија, со што, како што вели докажа дека и и најдолгите спорови во регионот можат да бидат решени.
Нагласува дека пристапниот процес не е еднонасочна улица, туку се гради врз одговорност од двете страни.
– Ако земји како Северна Македонија ги исполнуваат тешките услови, со жртви по населението и висок политички и личен ризик за Владата, тоа мора да биде препознато со тоа што ќе се турне земјата напред кон ЕУ. Ако нашите партнерски земји исполнуваат, нашите земји членки мораат исто така да исполнат, оценува Хан.
Таквиот чекор на ЕУ, истакнува еврокомесарот, не е само само награда за постигнувањата на индивидуалните земји туку и неопходен поттик и охрабрување за целиот регион да го задржи реформскиот напор. Интеграцијата на Западниот Балкан е инвестиција во стабилноста на Унијата и зачувување на нејзините политички, економски и геополитички интереси, вали Хан во интервјуто за МИА.
Како области каде има напредок во споредба со лани, Хан ги посочува: зајакнувањето на независноста на судството, конзистентните резултати во истрагите, обвиненијата и конечните пресуди за корупција и организиран криминал, вклучително и оние од висок профил, потоа работата на Државната Комисија за спречување корупција, реформата во делот на разузнавачките и безбедносните служби, преку соработката со НАТО и стратешките партнери за спречување на повторна појава на сериозните проблеми од минатото, како прислушкувањето, напорите за професионализација на јавната администрација и против наводните партиски назначувања, како и приврзувашењето на законот за ЈО.
За тоа дали резултатите од европските избори, посебно во Франција би се одразиле на оваа одлука на земјите членки за одобрување датум за нашата земја, Хан вели дека „со оглед на убедливиот напредок кој го направи Северна Македонија, уверен сум дека земјите членки ќе дадат зелено светло пред летото“.
-Пристапниот процес не е еднонасочна улица, туку се гради врз одговорност од двете страни. Ако земји како Северна Македонија ги исполнуваат тешките услови, со жртви за населението и висок политички и личен ризик од страна на владата, ова мора да биде препознато со тоа што ќе се турне земјата напред кон ЕУ. Како што секогаш велам: ако нашите партнерски земји исполнуваат, нашите земји членки мораат исто така да исполнат. Ова не е само награда за постигнувањата на индивидуалните земји туку е потребен поттик и охрабрување за целиот регион да го задржи реформскиот напор. Интеграцијата на Западниот Балкан е инвестиција во стабилноста на Унијата и зачувување на нејзините политички, економски и геополитички интереси. Една од приоритетните цели дефинирани во Сибиу беше да се стане вистински глобален играч. Каде на друго место да започнеме ако не во нашето непосредно соседство? Алтернативата би била да им се остави регионот на нашите конкуренти кои имаат своја политичка агенда, вели Хан за МИА.
Сепак тој инсистира да не се заборави дека во нашиот случај се работи за отворање преговори.
-Има уште долг пат до членство, но треба да и се даде шанса за старт на преговори на Северна Македонија, која покажа убедлива посветеност кон стратешката евроатлантска цел, додава Хан.
За тоа кои се ризиците доколку ваквата одлука се одложи за есен, Хан укажува дека е „уверен дека земјите членки ќе дадат зелено светло за Северна Македонија пред летото“ и дека овој сигнал е потребен за консолидирање на реформскиот напредок во земјата и на Преспанскиот договор.
-Ако ЕУ не испорача од своја страна, граѓаните би можеле да изгубат доверба во европската перспектива. Реформската динамика би можела да ослабне, не само во Северна Македонија туку во целиот регион, ова не е во интерес на ЕУ, вели Хан во интервју за МИА.