– Мирно спијам заради тоа како ја водам работата во законски процедури. Но не спијам мирно кога ме притискаат роковите, доколку нема да ја завршиме работата на време. Не спијам мирно ако знам дека некој наш сведок е загрозен, бидејќи ни помогнал во работата, вели специјалната јавна обвинителка Катица Јанева во интервју за МТВ1 на прашањето дали спие мирно и дали се соочува со притисоци и закани.
-Би било нескромно и несериозно ако кажам дека нема притисоци и суптилни закани. Сепак морам да кажам дека јас како прв човек на СЈО и моите колеги сме целосно свесни за целта која треба да ја постигнеме, рече Јанева.
Во останатиот дел од интервјуто таа ги повтори веќе познатите ставови за предметот Пуч каде еден од обвинетите е лидерот на СДСМ Зоран Заев, за двете обвиненија што СЈО ги поднесе, за тоа дали Уставниот суд би можел да го прогласи СЈО за неуставно, како и за тоа дека лично ќе присуствува на разгледувањето на Вториот извештај на СЈО во Собранието и во Советот на јавни обвинители.
Јанева повторно апелираше до Собранието да се донесат измените во Законот за заштита на сведоци, бидејќи според неа тоа е еден од клучните услови да се продолжи со истрагите.
-Сакам да апелирам преку МТВ дека Закондавниот дом треба да ги донесе измените во Законот за заштита на сведоци. Покрај овие случаи што ги презентиравме на прес-конференциите имаме и други случаи каде мора да имаме инструмент да ги заштитиме нашите сведоци.
Претходно во изјава за НОВА претставници на политичките партии искажаа поделени ставови во врска со тоа дали Јанева може да побара измени на законите.
„Обвинителката ни под разно не може да бара измени на законите, бидејќи не е надлежна за тоа. Може да бараат тие што се надлежни за тоа, вели Талат Џафери од ДУИ.
Од ВМРО ДПМНЕ пак велат дека дека ќе прават анализа, по која ќе го кажат нивниот став, но како што изјави Иво Котевски за НОВА „поентата е дека законите се изгласани, ако важат за другите обвинители тогаш треба да важат и за нив“.
Ставот на СДСМ по прашањето е познат. Според координатор на пратеничката група на СДСМ, Горан Сугарески, СДСМ може да ја покрене иницијативата, но само со нивните гласови таа веднаш ќе падне.