Штрајкувачките одбори на редакциите Вест, Утрински и Дневник решија да го зголемат времетраењето на штрајкот од 4 на 6 часа заради игнорантскиот однос на менаџментот кој иако уредно информиран со недели не покажа интерес за средба со синдикалните претставници, соопшти Самостојниот синдикат на новинари и медиумски работници на Македонија.
– Утре на 21 февруари ќе излезе 5.000 број на дневниот весник „Вест“. Жално е што редакцијата ќе го подготвува ова јубилејно издание од позиција на штрајк. Во претходните денови наместо разговор за решавање на проблемите се засилија притисоците врз медиумските работници со телефонски јавувања и закани со отпуштања и казнувања, се вели во соопштението.
Од ССНМ велат дека за сето ова ќе бидат информирани сите релевантни меѓународни институции, бидејќи, како што велат, „правото на штрајк е уставно гарантирано право и е дел од цивилизациските придобивки на демократскиот свет“.
-Решителноста на новинарите и медиумските работници во изданијата на МПМ не се намалува. Преку одбрана на нивните колективни права тие застануваат во одбрана и на демократскиот интегритет на професијата, се вели во соопштението.