На координација на пратеничките групи кај претседателот на Собранието Трајко Вељаноски претпладнево партиите ќе го усогласуваат текстот на измените на Изборниот законик, што е дел од договорот постигнат завчера.
ВМРО-ДПМНЕ ноќеска испратила драфт верзија до СДСМ, но опозицијата имала забелешки на непрецизноста на одредбите.
По координацијата, според најавите ќе се одржи собраниската седница на која треба да бидат донесени законските измени.
Со тоа пратениците од опозицијата од денеска повторно се вклучуваат во редовните собраниски активности, откако повеќе од еден месец ги бојкотираа пленарните седници и не учествуваа во работата на собраниските работни тела, откако не беше прифатен нивниот рок до кога требаше Уставниот суд да се изјасни за уставноста на Законот за Специјалното јавно обвинителство.
Според договорот денеска е крајниот рок за да се донесат измените на Изборниот законик.
Во Изборниот законик треба да се внесат измените кои се однесуваат на Избирачкиот список, вклучително и можноста Државната изборна комисија да ги брише оние гласачи од списокот што нема да се пријават во предвидениот рок. Според партискиот договор рок за пријавување ќе биде даден на 39.502 лица кои се сметаат за спорни.
Во измените треба да биде предвидено и ад хок телото за контрола на медиумите, кое ќе ја контролира нивната работа 100 дена пред изборите.
Новиот договор подразбира дека до 31 август треба да се исполнат неколку услови за одржување фер и кредибилни избори на крајот на годината (можен термин е 11 декември).