Министерот за надворешни работи на Словачка, Мирослав Лајчак денеска изјави дека ниедна од 28. земји-членки на ЕУ не била против отворање преговори со Северна Македонија на вчерашниот состанок на Советот за општи работи во Луксембург.

-Немаше ниедна земја членка која што рече „не“ за Северна Македонија. Земјите членки имаа проблем со Албанија и ова е дилема со која мора да размислуваме и да се справиме со неа. Има една резолуција од Холандскиот парламент, која што вели дека тие се против покана за Албанија и мислам дека во овој период до октомври треба да биде искористен од страна на Владата во Тирана да се справи со таквата загриженост која постои во земјите членки во врска со нив. Тие рекоа дека ова не е време за проширување, треба да се фокусираме на Брегзит и на консолидација, но преовладувачкото мнение е дека вашата земја направи одлични нешта со Преспанската спогодба и заврши одлична работа со реформите и сега е наша одговорност да го завршиме нашиот дел од домашната задача и да ви упатиме покана. Очекувам да се материјализира во октомври, изјави Лајчак на прес конференцијата со министерот за надворешни работи Никола Димитров во Скопје, каде е во посета во својство на претседавач со ОБСЕ.

Оваа изјава на шефот на словачката дипломатија, кој во Скопје доаѓа од состанокот на ЕУ во Луксембург, е спротивна од тврдењето на пратеникот од ВМРО-ДПМНЕ, Антонијо Милошоски кој на социјалните мрежи објави статус дека на ЕУ Советот „7 членки биле против датум за преговори со МК и АЛ: ФР, Холандија, Германија, Данска, Луксембург, Белгија и Шпанија. 12 членки биле за преговори: Полска, Унгарија, Словачка, Чешка, ИТ, СЛО, ХР, БГ, РО, ЕСТ, Латвија, Литванија. Грција и другите воздржани!“

Но текстот на кој Милошоски се повикува во својот статус е објавен на 29 април годинава во Фајненшел Тајмс и не се однесува на вчерашниот состанок во Луксембург, туку на средбата на Меркел и Макрон со лидерите од Западен Балкан во Берлин.

„Веста“ на Милошоски ја демантираат и од Владата. Извори од Владата за МИА велат дека ниту една држава не изразила сомнеж дека земјава ги исполнила сите задачи.

Холандија изразила очекување да се донесе Законот за Јавно обвинителство, но без негативен став и со согласност за почеток на преговорите годинава.

Најмногу за нас се „бореле“ Грција, Австрија, Словенија, Словачка, Луксембург, Унгарија, Романија, Малта, балтичките држави и еврокомеарот Јоханес Хан. Бугарија била крајно позитивна, Франција воздржана со барање на повеќе време за одлука за двете држави.

На крајот, заклучокот е донесен со консензус, сите се ЗА позитивна одлука во октомври и почеток на преговорите до крајот на годината. Сите држави се согласиле да го дополнат заклучокот со посебно признание за Договорот од Преспа и за Договорот за добрососедство со Бугарија и ги поздравиле и потврдиле резултатите од реформите. Сите се обврзале да се донесе јасна и суштинска одлука во октомври.