Политичката партија Левица ја повикува владата да ја ревидира најавената „засилена фискализација и фискална дисциплина врз грбот на работниците и земјоделците“. Тие сметаат дека политиката на измени во персоналниот данок и укинувањето на даночното ослободување на земјоделците кои годишно остваруваат приход до 300 илјади денари е погубна за сиромашните, работниците и средната класа.
Ќе се оданочуваат платите на работниците, а не профитите на газдите. Новата фискална политика предвидува измени во персоналниот данок. Во исто време, не се предвидени, ниту најавени, измени во данокот на добивка (или корпоративен данок), се вели во соопштението на Левица.
Според нив, најголемиот терет ќе падне врз земјоделците.
Законските измени го укинуваат даночното ослободување за земјоделците кои годишно остваруваат приход до 300 илјади денари. Се работи за мнозинството земјоделци, кои претходно ослободени од оданочување, сега ќе плаќаат данок на државата, која за возврат не го гарантира откупот на нивните производи и ги остава незаштитени од пазарот на ниски откупни цени. Земјоделците кои остваруваат приход помал од 300 илјади денари годишно, најчесто се единствени кои остваруваат приход во семејството.
Но Владата нема милост за овие семејства и не се задоволи со зголемувањето на цената на дизел горивата и водата, кои особено се користат во земјоделеството. Владата реши да биде уште понемилосрдна. Поради дупката во буџетот, делумно создадена од дуплираните трошоци за дневници и патувања на пратениците, ќе се цедат илјадници семејства, капка по капка, а преку оданочување на приход кој и така не е доволен за подмирување на основите потреби на семејството и семејното производство, велат тие и ја повикуваат владата да „стави рака на џебовите на милионерите“.