Од печат излезе шестата книга на „Македонски безбедносни лавиринти“ на на проф. д-р Трајан Гоцевски – универзитетски професор во пензија и поранешен декан на Филозофскиот факултет во Скопје, експерт од областа на одбраната и безбедноста, министер за одбрана во првата влада на независна и суверена Република Македонија и поранешен член на Советот за безбедност на Република Северна Македонија и на Свето Стаменов политиколог, новинар во Македонското радио – Радио Скопје и несомнено еден од најплодните македонски публицисти.
Објавувањето на оваа книга ја заокружува своевидната уникатна и досега единствена едиција не само во македонската, туку најверојатно и во европската публицистика, од шест книги во кои на околу 2.700 страници Б5-формат се „распослани“ 120 интервјуа, реализирани на програмите на Македонското радио – Радио Скопје во периодот од 30 октомври 2006 до 1. април 2025 година.
Оваа шесттомна едиција „Македонски безбедносни лавиринти“ – „своевиден архив на еволуцијата на независна Македонија“ и „историско сведоштво на македонскиот òд во НАТО и кон Европската Унија“, како и „теориски и практичен мега императив на безбедноста“ – започна со објавувањето на истоимената книга во 2015 година со 22 интервјуа, реализирани во периодот од 2006 до крајот на 2014 година и која во 2019 година беше реиздадена како прва книга на трилогијата „Македонски безбедносни лавиринти“. Втората книга содржи 15 интервјуа реализирани во 2015 и 2016 година, а третата книга – 12 интервјуа реализирани во 2017 и 2018 година. Во 2022 година беше објавена четвртата книга со 22 интервјуа реализирани во 2019 и 2020 година, а во првата половина на оваа 2025 година светлината на денот ја здогледа и петтата книга со 28 интервјуа, реализирани во 2021 и 2022 година.
Оваа шеста и последна книга на „Македонски безбедносни лавиринти“, пак, содржи 23 интервјуа, реализирани во рамките на редовните информативни програми „Актуелно“ и „Радио спектар“ на Македонското радио – Радио Скопје во периодот од 23 јануари 2023 до 1 април 2024 година кога, поради заминувањето во пензија на Свето Стаменов, соработката меѓу двајцата автори на брановите на Македонското радио – Радио Скопје беше прекината по силата на Законот. Но, книгата содржи уште пет досега необјавени интервјуа што беа реализирани до крајот на 2025 година. Интервјуата ја отсликуваат состојбата во која се наоѓаше нашава земја во тој период и се однесуваат на настани, постапки, процедури и случувања поврзани со македонската национална безбедност и одбрана, но и со други значајни настани за нашата држава, а кои се однесуваат на целиот период по распадот на Југославија, прогласувањето на нашата независност, формирањето и развојот на самостојниот македонски безбедносен и одбранбен систем и на неговата оружена компонента – Армијата на Република Северна Македонија, трнливиот македонски òд кон НАТО и предизвиците пред кои сме изложени на патот кон полноправно членство во Европската Унија.
И оваа шеста книга, како впрочем и петтата книга на „Македонски безбедносни лавиринти“, во знак на огромна и искрена благодарност, авторите ја посветуваат на Искра Чоловиќ (1960-2023) – доајен на македонското радио-спикерство, новинар и истакнат македонски публицист, која во 2015 година беше идејниот творец на „Македонски безбедносни лавиринти“.
Книгата е збогатена и со пригодни текстови–рецензии на проф. д-р Стево Пендаровски – поранешен претседател на Република Северна Македонија, проф. д-р Цане Т. Мојаноски – редовен професор во пензија, проф. д-р Ненад Марковиќ – редовен професор на Правниот факултет „Јустинијан Први“ во Скопје и поранешен член на Советот за безбедност на Република Северна Македонија, проф. д-р Димитар Пандев – редовен професор на Филолошкиот факултет „Блаже Конески“ во Скопје, проф. д-р Милан Јазбец – истакнат словенечки дипломат и поранешен амбасадор на Република Словенија во Скопје и Зоран Иванов – новинар и публицист.
Инаку, проф. д-р Трајан Гоцевски и Свето Стаменов, покрај шесттомното дело „Македонски безбедносни лавиринти“, коавтори се и на книгите „Македонски безбедносни лавиринти“ (2015), „Армија на мирот“ (2017), „Македонија во НАТО“ – I и II книга (2020) и „30 години македонска армија: Од работ на бездната до НАТО-армија низ етерот на Македонското радио – Радио Скопје“ (2023).