Околу осум илјади компании би можеле да ги исполнат условите за користење на владината финансиска поддршка, оцени денеска министерката без ресор задолжена за странски инвестиции Зорица Апостолска.
Според Апостолска, првичната бројка на компании кои можеле да ги искористат предвидените средства од државата била седум илјади, но со новите законски порписи, бројката барем од сегашна перспектива, ќе изнесува осум илјади.
Одговорајќи на новинарско прашање пред презентацијата на владината финансиска поддршка во Стопанската комора на Македонија, министерката ги потврди најавите на премиерот Зоран Заев дека интензивно се преговара со странски компании за инвестирање во Македонија.
– Меѓу компаниите има и италијански, главно од областа на медицинската опрема. Има и од други држави. Интензивно се преговара и тоа многу сериозно, потенцира Апостолска.
Ова го потврди и амбасадорот на Италија во Македонија Карло Ромео кој одговорајќи на новинарско прашање изјави дека бирократските процедури, бавната администрација и несоодветните квалификации на работната сила се клучните слабости што ги детектирале италијанските бизнисмени.
„По период на забавување и одложување на одлуките на италијанските компании за инвестирање во Македонија поради политичката криза, последниов период забележуваме повторно враќање на интересот. Италијанските инвеститори се заинтересирани не само за регионалниот, туку и за европскиот пазар“, рече Ромео.
Вкупната трговска размена меѓу Македонија и Италија во периодот јануари – февруари 2018 година е 104,72 милиони американски долари. Извозот изнесува 32,75 милиони, додека увозот достигнал 71,97 милиони долари. Остварен е дефицит од 39,22 милиона американски долари.
Италија е шести најголем трговски партнер на Македонија во периодот јануари – февруари 2018 година.