По долго боледување, на 43-годишна возраст денеска во Берлин почина македонската режисерка на документарни филмови, Билјана Гарванлиева.
Веста за нејзината смрт на социјалните мрежи ја сподели нејзиниот соработник на последниот проект, уметникот Јован Балов.
„Почитувани пријатели, денес не напушти Билјана Гарванлиева. Имав чест и радост да помогнам и учествувам во реализацијата на нејзиниот последен видео документарен запис. Почивај во мир!“, напиша Балов додавајќи дека таа пред само три недели ги снимила последните кадри од новиот документарец.
Нејзините документарни филмови играа на бројни светски фестивали, а таа за својот труд понесе и светски и регионални награди.
Авторка е на сценариото на „Златната петорка“, долгометражното играно деби на Горан Тренчовски, кое следната недела ќе го затвори овогодинешниот филмски фестивал „Браќа Манаки“ во Битола.