Први за осуда – Последни за почит. Со оваа парола Независниот синдикат на полицијата изрази револт кон обвинителството за третманот на нивните колеги кои се под истрага за пожарот во кочанската дискотека „Пулс“. Порачаа дека бараат правда за сите жртви, за нивниот колега Тоше Тодоровски кој го загуби животот во пожарот, а изразуваат поддршка на колегите кои ја преживеале трагедијата. Не се противат на истрагата против полициските службеници, туку бараат истрагата да биде јавна и транспарентна.
Барем еден распит на полициските службеници да биде јавно објавен да видите каков третман има обвинителството кон нас. Мислам дека апсолутно не е човечки еден обвинител да се обрати на нашите колеги осомничени, за кои не е докажана вина и се смета дека се невини се додека не се докаже вина со зборовите – ако вие бевте невини требаше вие да изгорите во трагедијата во Кочани. Тоа е нешто што ако полициски службеник го каже на граѓанин, верувајте дека ќе заглави по затвори, изјави Мартин Ефремов, претседател на незвисен синдикат на полицијата.
Полицајците симболично ги оставија нивните легитимации со цел да укажат како што рекоа дека им е смачено да чекаат кој следен од нив ќе биде уапсен. Од утре најавија дека започнуваат со поднесување на кривични пријави против обвинители и судиите.
Воедно бараме обвинителството итно да постапи и да излезе да види зошто Државната комисија за одлучување во управна постапка по втор степен не постапува по приговорите кои што ги поднесовме за решенијата за мирување на нашите колеги за кои што нема никаква пресумција на невиност. Дел од нив се уште немаат ни обвинение, меѓутоа повеќе од 6 месеци се оставени без плата, без придонеси, без никакво право на егзистенција. Можеби подобро ќе беше тие луѓе да ги ставеа во притвор, барем ќе имаше што да јадат и да пијат вака се оставени сами на себе, додаде Ефремов.
Изразија поддршка и за нивните колеги против кои се води дисциплинската постапка по убиството на велешанката Росица Коцева и нејзиниот татко, бидејќи и во тој случај прва на удар била полицијата, иако била поднесена кривична пријава за убиецот.
Собирот започна пред основното јавно обвинителство, продолжи кај црквата Богородица каде запалија свеќи за жртвите од пожарот во „Пулс“и заврши пред Обвинителството за гонење на организиран криминал и корупција.