Доколку до втори август Ректоратот на Универзитетот „Гоце Делчев“ од Штип не постапи по укажувањата на Државен просветен инспекторат и не ја повтори постапката за избор во повисоки звања, законски ќе одговара за тројцата професори кои веќе осумнаесет дена штрајкуваат со глад.
Ова се последните информации кои од адвокатската канцеларија Трпеновски им се соопштени на професорите Крсте Шајноски, Александар Костадиноски и Маргарита Матлиеска кои штрајкуваат во просториите на Синдикатот за образование, наука и култура во Штип.
Професорите велат дека доколку во следните три дена не се реши нивниот случај, тие на први август ќе се приклучат на масовниот штрајк кој го организира СОНК пред Министерството за образование во Скопје.
Професорот Крсте Шајноски за НОВА ТВ вели дека веќе и здравствената состојба им е влошена.
-Луѓе што штрајкуваат осумнаесет дена не може ни да бидат во подобра состојбата. Имаме зголемен крвен притисок, вртоглавици…. но нема да отстапиме од своите барања, вели Шајноски.
Поддршката за тројцата професори од ден на ден масовно расте. Во знак на солидарност со глад штрајкуваат и 46 претставници на Синдикатот ширум земјата. Граѓаните кои ги анкетираше НОВА исто така го поддржуваат штрајкот и сметаат дека она што се случува со професорите е катастрофа за целото образование.
Шајноски, Матлиеска и Костадиновски го почнаа штрајкот со глад откако и покрај позитивните рецензии не беа избрани во повисоки научни звања, а наставно- научниот совет на Универзитетот „Гоце Делчев“ од Штип одлучи да не останат и на досегашните позиции како вонредни професори.