Во просториите на Град Скопје денеска се одржа примопредавање на функцијата градоначалник на Град Скопје, каде протоколарно се сретнаа доскорешната градоначалничка Данела Арсовска и новоизбраниот градоначалник на Град Скопје Орце Ѓорѓиевски.
По средбата, Ѓорѓиевски во изјава за медиумите најави дека вечерва од 20:30 часот започнува акција за темелно чистење на главниот град, со која, како што рече, ја започнува реализацијата на првото ветување до граѓаните, враќањето на градот во нивни раце.
Започнувам со првата работа што им ја ветив на граѓаните, тоа е градот да го ослободиме и да го вратиме на граѓаните, со демонтажа на тие рампи кои што беа пред влезот на Град Скопје. Вечерва од 20:30 започнуваме со темелна активност за чистење на главниот град, изјави Ѓорѓиевски.
Истакна дека појдовната точка ќе биде пред паркингот кај салата „Борис Трајковски“, од каде ќе започне 72-часовната акција за чистење на главниот град.
Ѓорѓиевски се осврна и на својата средба со поранешната градоначалничка Данела Арсовска, која ја оцени како протоколарна.
Добро, ова беше протоколарна средба. Не гледав на часовникот, мислам дека многу помалку од еден час беше. После која имаше присуство и на нотар, за да го депонираме својот потпис и сè останато. Нормално е во примопредавање да имаме една протоколарна средба, посочи Ѓорѓиевски.