Министерството за финансии со прогресивното оданочување одлучи да се спротивстави на целокупната бизнис заедница која побара одложување за најмалку 5 години на зголемување на даноците поради крајно штетните последици што тоа ќе ги предизвика за бизнис секторот, рече на прес конференција членот на ИК на ВМРО – ДПМНЕ Трајко Славески кој е и поранешен министер за финансии.
„ Не само што ќе биде погоден бизнис секторот односно претпријатијата во Република Македонија зголемувањето на данокот директно ќе се одрази на платите на вработените оние кои што ќе бидат погодени со оваа мерка од причина што во систем во кој се исплатува бруто плата работодавачите нема да бидат подготвени да ги зголемат платите за сметка на зголемениот данок и тоа значи намалување на платите на вработените“ рече Славески.
По воведувањето на прогресивното оданочување, Славески очекува притисок врз компаниите да ги зголемат цените поради зголемените трошоци за труд со што ќе се зголеми стапката на инфлација. Понатаму зголемениот персонален данок на доход едноставно значи пониски нето плати затоа што значи дека работодавачите нема да го понесат тој дополнителен фискален товар. Зголемените даноци што е многу битно, значат и зголемена даночна евазија вели Славески.
Тој потсети дека и групацијата Македонија 2025, околу која се собираат македонски бизнисмени или бизнисмени од странство кои што се по потекло од Република Македонија не се согласувале со прогресивното оданочување, кое според нив може да го намали бројот на вработени и да ги намали идните инвестиции.
За најавените промени во пензискиот систем, Славески вели дека станува збор за „козметички промени“
„Ние очекуваме дека нешто радикално ќе се предложи затоа што таму состојбите навистина се алармантни со големиот дефицит во фондот на пензиско осигурување. Се оди со повторно зголемување на стапката на придонесот од 0,4% осигурување што од друга страна ќе значи зголемување на трошоците дополнително за работна сила. И некои козметички промени за кои нема значително да ја подобрат состојбата во пензискиот систем и останува некоја идна влада да бара решенија кои ќе бидат трајни“ кажа Славески.