Пратениците во Собранието на Република Македонија денеска по скратена постапка ќе гласаат за основање на Универзитетот за национална одбрана, безбедност и мир „Дамјан Груев” во Скопје.
Според опозицијата, незаконски е основањето на новиот универзитет да влегува во процедура кога опозицијата го има замрзнато своето учество во активностите на Собранието се до изјаснување на Уставниот суд за уставноста на Специјалното обвинителство.
Координаторот на пратеничката група на СДСМ Горан Сугарески формувањето на овој универзитет повторно е ставено на дневен ред во Собранието, овојпат дополнет со три факултети.
-Со повлекувањето и повторно пуштањето на нов закон за формирање на Универзитет „Дамјан Груев”, само овој пат со плус три Факултети, ВМРО-ДПМНЕ призна дека Интерпелацијата за претседателката на комисијата за образование Олга Најденовска е основана. Ова е уште едно големо признание на ВМРО-ДПМНЕ дека работи незаконски.
Незаконската работа на ВМРО-ДПМНЕ потроши многу пари на граѓаните за неделовнички седници на комисијата за образование. Ваквото класично шверцерско носење на закон за формирање на Универзитет по скратена постапка е уште една голема потврда дека на ВМРО-ДПМНЕ најважно му е да ги вдоми своите партиски војници, а воопшто не му е важно образованието во Република Македонија, изјави Сугарески.
Од владејачката партија велат дека новиот универзитет се основа за да се спречи монополот што го држи Универзитетот „Свети Кирил и Методиј“.
– Јавната тајна дека на дел од факултетите во Скопје и дел од професорите во Скопје постои чување на монополот и чување на фамилијарните релации и потврдената фактичка состојба со акцијата на Јавното обвинителство и на Министерството за внатрешни работи во која беа уапсени видни професори од Економскиот факултет во Скопје, ни дава право да кажеме дека дискусијата и дебатата помеѓу ВМРО-ДПМНЕ и СДСМ околу новиот универзитет „Дамјан Груев“ се сведува на дискусија и на дебата дали во Македонија треба да го заштитиме монополот на одредени факултети и на одредени професори, како што се залага СДСМ или, пак, треба да дозволиме, да ја стимулираме и да ја помогнеме конкуренцијата за која се залага ВМРО-ДПМНЕ – рече координаторот на пратеничката група на ВМРО-ДПМНЕ, Илија Димовски.