Франција е во жалост по терористичкиот напад во Ница, во кој загинаа 84 лица, меѓу нив голем број деца, а има и голем број сериозно повредени. Сите во Франција сочувствуваат и сите се во потрага по своите најблиски, изјави денеска во француската резиденција амбасадорката на Франција во Македонија Лоранс Оер .
Aмбасадорката потенцираше дека според досегашните сознанија нема македонски државјани меѓу жртвите. Отворен е ургентен број во Париз каде што луѓето ќе можат да се информираат. Таа истакна дека на барање на францускиот претседател Оланд во сите нивни амбасади ќе биде прогласен Ден на жалост во наредните три дена, а ќе биде отворена и Книга на жалост за сите оние кои ќе сакаат да се потпишат во неа.
Оер рече дека напаѓачот е идентификуван и дека станува збор за француско-туниски државјанин на возраст од 31 година, кој се одлучил за вистински терористичко-исламистички чин.
„ Да се влета во толпа од луѓе со камион по завршувањето на дефилето, а во моментот на огнометот по повод прославата на шеталиштето наречено Англиска променада е навистина нешто со голема симболика. Фактот што атентатот се случи на 14 јули е со посебна тежина. На денот на францускиот национален празник – на Денот на слободата е навистина полно со симболика за нас затоа што станува збор за симболиката на Француската Република.“, рече Оер.
„Она што можам да кажам е дека ќе одговориме најдобро што можеме преку истрагата, но исто така ќе дадеме се од себе во иднина такви настани да не се повторат, вели Оер.
Таа нагласи дека Франција нема да попушти пред борбата против тероризмот за што, рече, е неопходна целокупната меѓународна соработка со сојузниците и партнерите бидејќи, вели, многу добро знаат дека претставуваат цел, но не како индивидуи, туку како системот на вредности кој го споделуваат.
„ Затоа ќе одговориме бидејќи не сакаме повеќе да се случуваат невини жртви да гинат. Затоа и меѓународната соработка е неопходна повеќе од кога и да е во овој момент која е исто така поткрепена и со огромна солидарност од сите страни.“, изјави на денешната прес конференција амбасадорката Оер.