Во тензична атмосфера и со помош на членовите во Студентскиот Парламент,  кандидатите за сенатори на Универзитетот Кирил и Методиј денеска се обидуваа да влезат во просториите на Ректоратот на УКИМ и покрај студентската блокада која почна утринава.

Точно во 8 часот, претставници на Студентскиот пленум со жив штит не дозволуваа вработените во Ректоратот да влезат во просториите со цел да се спречи седницата на Сенатот.

Тие алармираа дека со конституирање на сенатот, во ова тело ќе се даде мандат на 10 нелегитимни претставници на студентите кои ќе имаат право незаконски да одлучуваат во сите одлуки на Универзитетот, вклучувајќи го и изборот за нов ректор. Поддршка добија и од професорскиот пленум.

 

По неколку часа нагодување, студентите се сложија на седницата на сенатот да присуствуваат четворица нивни претставници. Тие до тричлената комисија за верификација на мандатите доставија обемна документација дека студентските претставници се нелегитимни, но сепак Комисијата утврдила дека нема ништо спорно во мандатот на десетте студентски претставници.

 

И покрај барањата на Студентскиот пленум, студентите од Студентскиот Парламентот да објаснат од каде е нивниот мандат, кога биле гласани и кој ставил печат на нивните мандати, обидите за дебата завршија неуспешно. Така одлучи ректорот, по што студентите демонстрантивно ја напуштија седницата.

По бурната расправа, Сенатот сепак одлучи да ги спроведе изборите за нов ректор, каде што со 43 гласа, за прв човек на Универзитетот беше избран Никола Јанкуловски – досегашниот декан на Медицинскиот факултет. За него гласаа и претставниците на Студентскиот Парламент, за чија легитимност се спореше со часови.

Студентите и дел од Професорскиот пленум во неколку наврати посочија дека сите одлуки на УКИМ со кои гласаат нелигитмни претставници на студентите, еден ден ќе бидат оспорувани пред Законот. Тие посочија дека ова е една од најсрамните одлуки во историјата на најстариот Универзитет, кога уште гласот на студентите е погазен. Погледнете го видеото.