Кривичниот суд соопшти дека оформен е предмет за едно од обвиненијата кои што ги поднесе Специјалното обвинителство, односно за настаните во општина Центар.
Судечкиот судија кај кого беше распореден обвинителниот предлог главната расправа ја закажа за 21 ноември во 10:00 часот, за кога се испратени покани до странките во постапката заедно со примерок од обвинителниот предлог.
Од Судот појаснуваат дека терминот е одреденсо оглед на распоредот на претходно закажани судење на судијата кој постапува по притворски предмети, а и големиот број на обвинети опфатени во овој предмет.
СЈО пред две недели поднесе обвинение кое се однесува на нарачаното насилство врз градоначалникот на општина Центар Андреј Жерновски за време на седница на општинскиот Совет, кога се случи протест пред Општината.
Обвинението следува по телефонски разговор содржан во прислушуваните материјали, а кој опозицијата го објави јавно. Првообвинетиот е дел од извршната власт.
-Разговорот е воден откако веќе била закажана седница на Советот на општина Центар. Произлезе сомнение за потикнување насилство. Ова јавно обвинителство презеде низа активности дали содржината на снимката има своја завршница.Поради наведените причини беа прибавени голем број видео записи, материјални докази, а беа испитани и 20 сведоци. Дел од сведоците побараа заштита, рече Фетаи.
Обвинитението е поднесено против 14 лица за кривичното дело насилство од кои 5 лица се обвинети како поттикнувачи и за 9 лица како директни извршители на насилството.
-Од доказниот материјал произлезе дека во месец јуни првообвинетиот побарал, а второобвинетиот прифатил да извршат грубо насилство спрема градоначалникот на општина Центар. Анализите кои ги направи ова Обвинителство упатуваат на тоа дека мотивите на првообвинетиот за ова се чисто лукративни, за остварување на бизнис интересите на партискиот врв, рече Фетаи.
>>>Што слушна јавноста во бомбите за настаните пред општина Центар