Сетот владини мерки за финансиска поддршка е подеднаков и за домашните и за странските инвеститори, истакна денеска вицепремиерот за економски прашања Кочо Анѓушев образложувајќи го Законот за финансиска поддршка на инвестициите пред пратениците на 45 собраниска седница.
„Се обидовме да направиме сет на мерки кои ќе бидат максимално транспарентни и поддржувачки за сите. Аплицирањето е транспарентно и во согласност со одредени критериуми. Се работи за компании кои задоволуваат два основни критериуми – да иматат пораст на приходите во тековната година во споредба со претходните три години и тие компании да не намалуваат број на вработени, освен во текстилната и кожарската индустрија каде овие критериуми ги олабавивме за да може и тие индустрии да бидат опфатени“, рече Анѓушев.
Тој информира дека единствени корисници на овој закон ќе бидат компании кои се производно ориентирани. Анѓушев потенцира дека никој во Владата не е против странските инвеститори, но оти не се согласуваат со начинот на кој претходно се трошени парите за нивна поддршка.
Пратеникот Драган Цуклев од ВМРО-ДПМНЕ рече дека недостигот на јасен и усогласен концепт во водењето на економските политики „стана обележје на работењето на Владата“.
„Со овој предлог-закон имаме целосна промена на концептот за привлекување инвеститори, за субвенционирање на инвестициите. И ние нема да го кочиме донесувањето на овој закон, но укажавме или сугериравме на потребата од измени во некои членови кога се во прашање субвенционирање инвестиции, односно инвестиции за конкурентност“, рече Цуклев.
Со мнозинство гласови, Собранието денеска на првото продолжение на 45 седница го донесе Законот за финансиска поддршка на инвестициите.