Демонстрантите кои се дел од антивладините протести на Шарената револуција, денеска во седум часот повторно се собраа пред зградата на Специјалното обвинителство, за да ја изразат нивната поддршка за оваа институција.
Со носечки транспарент кој гласи „Вистинските државници не им се закануваат на граѓаните“, и извикувања „Нема правда, нема мир“, граѓаните се упатија кон Министерството за правда.
Огромно присуство на полицијата, метални барикади и водени топови повторно се наоѓаат на улицата кај „Палома Бјанка“ за да се спречи евентуално одење кон партиската зграда на ВМРО-ДПМНЕ, јавуваат репортерите на НОВА.
Демонстрантите најавуваат дека протестите ќе продолжат се додека не се исполнат нивните барања: Оставка на Владата и претседателот Иванов, техничка влада која ќе организира фер избори, како и уставна заштита на СЈО и формирање на Специјално одделение во кривичниот суд, кое ќе ги преземе предметите на Специјалното обвинителство.