Земјите од Југоисточна Европа, посебно земјите кои имаат аспирации за членство во ЕУ треба да ги стандардизираат и унапредат буџетските политики за интеграција на Ромите во нивните општества.
Ова е детектирано како една од главните цели во претстојниот период на кој треба да се фокусира Акцискиот тим на Регионалниот совет за соработка (RCC), како и националните координатори во земјите кои се членки на Процесот за соработка во Југоисточна Европа (SEECP), на денешниот состанок одржан во Белград.
Забележавме позитивни исчекори во областа на образованието, а особено во промоцијата на предшколоското образование – изјави Орхан Усеин, шеф на Акцискиот тим на проектот Интеграција на Ромите 2020.
Тој меѓутоа, како што соопшти RCC, предупреди на се уште постоечката омраза и дискриминација. „Во образованието преовладува дискриминацијата, а кривичните дела сторени од омраза, како и говорот на омраза се во пораст, за што сведочат невладините организации“.
Претсавник од Генералната дирекција на Европската комисија за добрососедство и проширување ги потсети учесниците дека ја имаат целосната поддршка, но и дека имаат обврски што треба да се исполнат.
-Одржливиот напредок во интеграцијата на Ромите е важен дел од подготовките за пристапување во Европската унија, изјавил Мортен Јунг на состанокот на Акцискиот совет и на националните координатори за овој проект, претставници на владите членките на SEECP, меѓу кои и Република Македонија.
Целта на проектот Интеграција на Ромите 2020 што го спроведуваат RCC, Фондацијата Отворено општество и ЕУ, е да се намали социо-економскиот јаз помеѓу ромското и неромското население на Западен Балкан и Туја.