Со продлабодувањето на буџетскиот дефицит со ребалансот на буџетот од 3,4% на 4,9%, притисокот врз задолжувањето се зголемува. Тоа е спротивно на заложбите за фискална консолидација, но и кршење на фискалните правила поставени во Законот за буџети.
Соња Танеска, новинарка и експертка за економски прашања, во изјава за ЦивилМедиа оценува дека првите 100 дена од мандатот на новата Влада предводена од ВМРО-ДПМНЕ се карактеризираат со сериозни економски пропусти и неодржливи политики, почнувајќи од најавената „есенска кошничка“ до „неодговорните задолжувања“.
Првите 100 дена од мандатот на новата Влада предводена од -МРО-ДПМНЕ се карактеризираат со сериозни економски пропусти и неодржливи политики. И покрај навестувањата за ‘есенска кошница’, цените на основните производи речиси и да не претрпеа значајни корекции. Дополнително, неодговорните задолжувања преку унгарски кредити и државни обврзници го продлабочуваат долгот, без да се спроведат суштински реформи за подобрување на економската стабилност, изјави Танеска за ЦивилМедиа.
Според нашата соговорничка, социјалните мерки имаат популистички карактер и „претставуваат сериозен фискален ризик“.
Популистичките мерки за зголемување на пензиите, иако краткорочно популарни, претставуваат сериозен фискален ризик и ќе предизвикаат големи дефицити во државниот буџет во случајот над 200 милиони евра. Во меѓувреме, нема никаква најава за законски измени кои би ја подобриле наплатата на придонесите, а недостасуваат средства за раст на платите. Ова е особено загрижувачки во контекст на соседните земји, каде што забележуваме континуиран раст и на минималните и на просечните плати, анализира Танеска.
Понатаму, Танеска го анализира и јавниот долг и буџетскиот дефицит по ребалансот на буџетот со решенија „спротивни на заложбите за фискална консолидација“.
Согласно последните податоци, за вториот квартал јавниот долг е на ниво од 60.5%, што го надминува фискалното правило од јавен долг под 60 % од БДП. Дополнително, со продлабодувањето на буџетскиот дефицит со ребалансот на буџетот од 3,4% на 4,9%, притисокот врз задолжувањето се зголемува. Тоа е спротивно на заложбите за фискална консолидација, но и кршење на фискалните правила поставени во Законот за буџети, алармира Танеска.
Алармантна е и оценката на Танеска во контекст на финансиската поддршка за земјата од ЕУ, што е последица од стопирањето на проектите поврзани со Коридорот 8, како и други аспекти на прашањето за инвестициите и економскиот раст, како и перспективите по одвојувањето на Албанија од Северна Македонија во процесот на евроинтеграциите.
Истовремено, постои сериозна опасност Македонија да изгуби финансиска поддршка за над 120 ЕУ проекти, како резултат на стопирањето на Коридорот 8, кој е од витална стратешка важност за државата. Владата, пак, го фаворизира Коридорот 10, што е од поголем интерес за Унгарија и Кина, со цел подобра поврзаност со грчките пристаништа под кинеска контрола. Дополнително, промовираните инвестиции всушност се наследени од претходната влада, а без нови инвестиции на економски раст, а ќе ги има се помалку бидејќи во моментот Албанија ќе стане поатрактивна земја за започнување бизнис поради отворањето на поглавјата, новата Влада ја загрозува и иднината на македонската економија, оценува Танеска во изјавата за ЦивилМедиа.
Текстот е сопственост на ЦивилМедиа.мк