Украина мора да добие сѐ што ѝ е потребно од Западот за победа во војната против Русија, што е важно не само за Украина, туку и за цела Европа, изјави полскиот претседател Анджеј Дуда.
Според британскиот Сандеј Тајмс, Дуда потенцира дека и покрај разликите меѓу Полска и Украина, неговиот став останува непроменет. – Секој сантиметар од украинската територија кој би ѝ бил препуштен на Русија како дел од договор би бил катастрофална грешка, изјави тој.
На прашањето дали Украина реално може да ги врати сите окупирани територии, Дуда изјави: „Ако сте толку дарежливи кон Русија, зошто не ѝ дадете дел од вашата земја? Зошто Русија заслужува туѓа територија?“
Дуда исто така зборуваше за проектот „Источен штит“, нарекувајќи го „нова верзија на Железната завеса“. Според него, некои западни политичари со страв гледаат на овој проект. – Ако треба да се осигура безбедноста на моите сограѓани со враќање на Железната завеса, тогаш нека постои Железна завеса. Најважно е да бидеме на нејзината слободна страна, истакна Дуда.
Како дел од проектот „Источен штит“, Полска до 2028 година планира да изгради 700 километри одбранбени системи, логистички центри и системи за противвоздушна одбрана покрај границите со Русија и Белорусија.
Полскиот дипломат Пјотр Лукашевич изјави дека проектот има за цел да заштити од инвазијата на Русија и Белорусија и дека се базира на украинското искуство.