Во театарот Долби во Лос Анџелес заврши 85. доделување на филмските Оскари во 24 категории.
Првата дама Мишел Обама заедно со Џек Николсон го прогласија „Арго“ за најдобар филм за 2012 година. Бен Афлек во емотивен говор рече дека не е важно колку пати ќе паднете, туку е важно да станете.
Наградата за режија му припаднаа на Анг Ли за најдобра режија за „Животот на Пи“, ова е негов втор Оскар, а тој ја подели наградата со сите 3 илијади луѓе кои работеле на овој филм. Стана познат во 2000 година со филмот „Клекнат тигар, скриен змеј“ а негови се “Планината Броукбек“ и „Разум и чувствителност“.
За најдобри актер и актерка годинашните Оскари ги освоија 22 годишната Џенифер Лоренс за филмот „Во добро и зло“ и фаворитот Даниел Деј Луис за неговата брилијантно олицетворение на Абрахам Линколн во насловната улога во „Линколн“ на Стивен Спилберг. Ова е негов трет Оскар, го посвети на неговата мајка.
Оскар за најдобра споредна машка улога освои Кристоф Волц, за филмот „Џанго разузданиот“ на Квентин Тарантино. За оваа улога тој беше награден и со Златен глобус и БАФТА. Тој веќе има еден Оскар од 2010 година за филмот „Inglourious Basterds“.
Оскарот за споредна женска улога отиде кај Ен Хатавеј за „Клетници“. Таа победи во силна конкуренција во која беа и Сали Филд и Хелен Хант. „Се надевам дека несреќите што и се случувале на Фонтин ќе бидат само дел од филмските приказни, но нема да се случуваат во реалноста“, рече таа. Оваа улога и’ ги донесе и Златниот глобус и наградата БАФТА. За филмот ослабна на 48 килограми.
Најдобар анимиран краток филм е „Пејпермен“, на Џон Карс, продукција на „Дизни“.
Оскар за најдобар долгометражен анимиран филм доби „Брејв“, кој веќе освои и Златен глобус.
Клаудио Миранда е награден со Оскар за најдобар директор на фотографија за „Животот на Пи“.
Оскар за најдобри визуелни ефекти доби филмот „Животот на Пи“, на овој филм работеше и македонската компанија за за визуелни ефекти и анимација ФХ3Х.
Најдобри костими има филмот „Ана Каренина“, Жаклин Дуран го освои својот прв Оскар, но ова за неа беше трета номинација.
Оскар за најдобра шминка и фризури за „Клетници“.
Најдобар краток филм е „Полициски час“ на Шон Кристенсен.
Најдобар краткометражен документарен филм е „Инсенте“ на Шон Фајн и Андреа Никс Фајн.
Оскар за документарен филм за 2012 година доби „Во потрага по шеќерниот човек“.
Најдобар филм од неанглиско говорно подрачје е „Љубов“ на Петер Хандке кој веќе освои голем број високи филмски награди: Цезар во Франција, наградата на Европската филмска награда и други.
Најдобра монтажа на звук има филмот “Клетници“.
Оскарот за најдобра монтажа на звучни ефекти го поделија “00:30 Тајна операција“ и “Небесен пад“.
Награда за најдобра монтажа освои Вилијам Голденберг за „Арго“, ова е негов прв Оскар и четврта номинација.
Оскар за најдобар продукциски дзајн освои филмот „Линколн“ и Рик Картер.
Најдобра оригинална филмска музика има “Животот на Пи“, на композиторот Мајкл Дана.
Најдобра песна е “Skyfall“ на Адел и Пол Едфорт.
За адаптирано сценарио награден е филмот „Арго“ и Крис Терио.
Квентин Тарантино за „Џанго разузданиот“ освои Оскар за оригинално сценарио. Тој рече дека морал да избере вистински актери за ги оживеат ликовите што ги замислил и им се заблагодари на актерите.
Инаку, шегите на водителот Сет Мекферлан дека ова ќе биде бледо и неуспешно шоу, се остварија но, само за неговиот дел, според коментарите на социјалните мрежи- тој самиот не беше доволно харизматичен, а шегите се оценети како здодевни и на моменти некоректни.
Оваа година во конкуренција се најдоа квалитетни остварувања и големи актери. Церемонијата помина во знакот на холивудските легенди.
Светла точка на годинашново доделување беа музичките делови на церемонијата, особено изведбите на Ширли Бејзи, Адел и Нора Џонс.
Барбра Стрејсенд по 35 години настапи на оскаровската церемонија.