„Преку вложување во регионалниот мир и глобалната стабилност, истовремено вложуваме и во сопствената безбедност“, рече претседателот и врховен командант на вооружените сили на Северна Македонија, Стево Пендаровски на затворањето на меѓународната воена вежба „Одлучен удар 21“, каде пред високи државни претставници од земјава и странство беа презентирани бојни гаѓања и офанзивна координираност.
„Оваа вежба е значајна за зајакнувањето на трансатлантското партнерство и преку тоа за безбедноста на Европа и на Западниот Балкан. Со заедничкото планирање и реализација на една ваква вежба, Северна Македонија и САД го афирмираат стратешкото партнерство кое долги години постои меѓу нас“, рече Пендаровски и додаде дека продолжуваат реформите во армијата, инвестирање во одбраната, модернизирање и опремување на армијата.
Премиерот Зоран Заев пак од Кривиолак порача оти е горд на македонската Армија, на војниците и офицерите и нивната желба за усовршување и унапредување.
„Со членството во НАТО не сме повеќе сами. Северна Македонија никогаш повеќе нема да биде ставена ниту ставена под прашалник ниту изолирана од светот. Како дел од моќното НАТО-семејство, како неизоставен дел од безбедносниот штит на најмоќниот воен сојуз во светот нашата држава стана фактор за стабилност во регионот, извозник на безбедност“, рече Заев.
Министерката за одбрана Радмила Шекеринска истакна дека тука сме да покажеме дека моќта на НАТО е во неговото заедништво.
„Северна Македонија веќе не е партнерот или еден од партнерите на НАТО кој се обидува својата Армија да ја доближи до сојузничките армии. Денеска сме сојузник во Алијансата со Армија која е рамноправна, сојузничка и која ја гарантира безбедноста и сигурноста на сите свои граѓани, но и заедно со другите армии на сите граѓани коишто се дел од Алијансата. Во изминатите 14 дена пешадиските и специјалните единици на армиите на С.Македонија, САД, Грција и Бугарија покажаа дека дејствуваат како едно, дека тие се моќта на НАТО, дека македонскиот војник во акција може да го довери својот живот на американскиот, на бугарскиот и грчкиот или, пак, да го брани животот на секој свој сојузнички колега додека се одвива акцијата“, рече Шекеринска.
Таа изрази надеж дека онака како што работеа нашите војници и офицери, нашите сојузнички армии така во следните недели заеднички ќе работат и нашите избрани претставници и политичари и ќе донесат одлуки коишто ќе бидат инвестиција и политичка, а не само воена во нашата заедничка безбедност и иднина.
Вежбата „Одлучен удар 21“ почна на 17 мај, а ќе биде финализирана на 2 јуни. Учествуваат околу 1500 војници, а ја предводат армиите на Република Северна Македонија со 1.100 припадници и на САД, со 300 учесници. Армиите на Грција и на Бугарија учествуваат со по 20 припадници.
На армискиот полигон во Криволак, покрај претседателот на Собранието Талат Џафери, присуствуваа и претседателот на државата Стево Пендаровски, премиерот Зоран Заев, министерката за одбрана Радмила Шеќеринска и други министри во Владата, министерката за одбрана на Црна Гора, потпретседателот на Собранието Горан Мисовски, членови на собраниската Комисија за одбрана, началникот на Генералштабот, генерал потполковник Васко Ѓурчиновски и други високи армиски претставници, амбасадорката Кејт Мари Брнз, како и дипломатскиот кор присутен во Република Северна Македонија.