Европските избори се закажани од 22 до 25 мај во земјите членки на ЕУ. Ова ќе бидат осмите европски избори кои се одвиваат во еден круг. На нив ќе се изберат 751 пратеник од 28 земји членки.
Овие избори ќе донесат значајна промена. Договорот од Лисабон кој стапи на сила на 1 декември 2009 година предвидува претседателот на ЕК да го избира Европскиот парламент (ЕП) кој треба да одбере човек помеѓу предлозите што ќе ги дадат земјите членки. Овој пат предлозите на земјите членки ќе мораат да се потпираат врз резултатите од изборите што значи дека човекот кој ќе ја води ЕК ќе мора да освои добар резултат на изборите.
Сајтот на изборите е веќе оперативен и може да се консултира на сите официјални јазици на ЕУ на адресата http://www.elections2014.eu
Европските либерали овој викенд одлучија дека белгиско-финско дуо ќе ги води на европските избори. Дуото е составено од поранешниот белгиски премиер Ги Верхофштад и Финецот Оли Рен кој во два мандати беше комесар во Европската комисија (ЕК), прво како прв човек на проширувањето на ЕУ а потоа и како комесар за економија.
Верхофштад е убеден европски федералист кој се залага за креирање на соединети европски држави и влегува во трка за претседател на ЕК. Рен ќе биде кандидат за некое од значајните места во економијата или дипломатијата во следниот состав на ЕК.
За овие избори своите кандидати ги избраа и социјалистите. Нив ќе ги води Германецот Мартин Шулц, сегашен претседател на ЕП. Од партијата на “зелените” избрани се Французот Жозе Бове и Германката Ска Келер а радикалната левица ќе ја води Гркот Алексис Ципрас, лидер на Сириза.
Единствените кои се уште не се појавиле со свои кандидати се демохристијаните. Нивниот изборен лидер ќе го бираат на конгресот во Ирска во март.