Безбедноста на Европа е на пресвртница, објавува во нејзината порака на социјалната платформа Икс, претседателката на Европската комисија Урсула фон дер Лајен , која заедно со претседателот на Европскиот совет Антонио Кошта ќе учествува на неформалниот состанок на мала група европски лидери попладнево во Париз.
Само што пристигнав во Париз на критични разговори. Безбедноста на Европа е на пресвртница. Да, се работи за Украина, но и за нас. Итно ни треба нов начин на размислување. Треба да ја засилиме одбраната. И сега ни требаат и двете“, нагласува фон дер Лајен.
Антонио Кошта од своја страна посочува дека на денешниот самит во Париз, под претседавање на францускиот претседател Емануел Макрон и во присуство на генералниот секретар на НАТО Марк Руте, ќе се одржат консултации „за ситуацијата во Украина и безбедноста на Европа“.
Ова е почеток на процес кој ќе продолжи со вклучување на сите партнери посветени на мирот и безбедноста на Европа. ЕУ и нејзините земји членки ќе имаат централна улога во овој процес, нагласува претседателот на Европскиот совет, во неговата објава на „Икс“.