Приштина: Поранешниот премиер на Косово, Авдула Хоти, изјави дека новата Влада на Косово, која ќе се формира по изборите во февруари 2025 година треба да го насочи својот фокус кон договорот од Вашингтон кој на 4 септември 2020-та тој го потпиша како тогашен премиер, со претседателот на Србија, Александар Вуиќ, а со посредство и во присуство на тогашниот американски претседател Доналд Трамп.
Хоти на Фејсбук напиша дека отпочнувањето на инфраструктурните проекти предвидени со тој договор е во интерес на Косово и идната влада треба веднаш да започне со подготовка на планови за реализација и да обезбеди основни средства. После тоа, според Хоти, ќе биде потребно дополнително да се влезе во преговори со стратешките партнери за реализација и целосно финансирање на проектите.
Пратеникот на опозицискиот Деморкатски сојуз на Косово и потписник на Вашингтонскиот договор вели дека четири години со неговиот наследник на чело на косовската Влада, актуелниот премиер Албин Курти, „се изгубени“, а „стотици милиони евра инвестиции не се реализираа и илјадници работни места не се отворија“.