Дента кога Дуинг бизнис објави дека Македонија е шампион на кој и по завидува и Швајцарија, во еден дневен весник се појави оглас кој ја потврдува неверојатната ефикасност на македонските институции кога е во прашање бизнис.
Извесен инспектор Ѕвездан во Општината Прилеп во септември годинава констатирал диво изграден објект. Со оглед на тоа дека ова е правна држава и дека најреформираната администрација на светот и пошироко, која се разбира не дозволува ништо да се случува вон словото и духот на законот, Ѕвездан постапил согласно принципите на вака поставената администрација.
Донел решение за уривање на диво изградениот објект од 17 метри квадратни согласно Законот за управна постапка за да го заштити интересот на државата.
Решението како што предвидува законот, се обидел да го достави до „инвеститорот“ извесен Благоја Велковски кој како што констатира и самиот инспектор Ѕвездан е лице кое починало, не се знае кога. Починатиот Велковски (од само на Ѕвездан познати причини ) одбил да го прими решението на наведената адреса по што Ѕвездан веднаш, како што предвидува законот истото решение го објавува во повеќе дневни весници, по што решението се третира како доставено па сега Ѕвездан без никакви проблеми сега може да премине кон извршување на решението. Треба само да почека уште 8 дена колку што на починатиот Велковски му се оставени на располагање да поднесе жалба на истото.
Инспектор Ѕвездан не заборавил да го потсети Велковски дека доколку реши да се жали на ова решение ќе треба да најде начин да воспостави платен промет меѓу овој и „оној“ свет и на жиро сметката на државата РМ да уплати 250 денари таска за жалбата.
Редакцијата на НОВА се обиде со призивање на духови да воспостави контакт со инвеститорот Велковски за да го праша за негова реакција. По неколкуте сеанси духот на Велкосвки се јави и ни соопшти дека го прочитал огласот и дека е во прашање сериозна работа штом истиот е објавен во дневните весници Дневник и Вечер кои на своите страници приопштуваат содржини кои во светот на мртвите имаат голема релевантност па побара време да размисли како ќе постапи.
На крајот од нашата комуникација Велковски изрази вџашеност од ефикасноста на администрацијата која во времето кога тој бил на овој свет во „деведесетите БЦ“ била комуњарска и неефикасна. Велковски исто така побара да пренесеме дека по објавата на ова решение сфатил зошто некои негови пријатели во светот на мртвите се уште гласаат на изборите во Македонија. Очекуваме Велковски наскоро пак да нис е јави и да не извести што ќе превземе во врска со решението на инспектор Ѕвездан.
.jpg)