И во денешните судири на полицијата и демонстрантите на плоштадот Мајдан во Киев демократијата падна во вода. Загинаа најмалку 100 луѓе а речиси 600 други се повредени. Претседателот на Украина Виктор Јанукович вчера го разреши началникот на армијата, генералот Володимир Замана, бидејќи според наводите не сакал да употребува повеќе сила врз демонстрантите.
Случувањата во Киев преку медиумите како и пораките низ социјалните мрежи се видливи веќе за сите. Но она што вчера го потенцираше шефот на шведската дипломатија, Карл Билт, станува сериозно прашање – ќе оди ли Украина во насока каде и претстојат уште повеќе страдања и насилство?
.jpg)
Режимот, како што вчера го опиша во интервју за НОВА, Дејвид Ливингстон од Европскиот совет за надворешни работи, лесно може да стане понасилен од моменталната состојба, а според него, ескалацијата на протестите е последица на волјата на Јанукович да преживее без да го смени неговиот авторитарен политички и корумпиран економски систем.
Воедно следува прашањето кој го штити Јанукович и неговата одлучност за поблиска соработка со Русија, и покрај цврстата волја и општо позната на целата украинска нација која својата иднина ја гледа во Европа?
Името „Беркут“ или „Златен Орел“ е синоним на полициска бруталност за многу од демонстрантите во главниот град Киев. Беркут е елитна полициска единица која беше на чело на бојното поле изминативе смртоносни судири.
Членовите на оваа единица сега се обвинети за тепање, измачување, како и пукање врз демонстрантите. Според наводите, во текот на протестите забележани се и напади врз новинарите и медицинските работници.
Изминатиот месец се појави и видео за кое, украинскиот студент Микаило Нишкогу тврди дека бил измачуван од полицајците, целосно гол на температури под нулата.
За членовите на Беркут важи дека се внимателно избрани, подобро обучувани, платени и опремени од обичните полициски службеници. Единицата е основана во 1992 година со потекло во Омон, од советската бескруполозна „полиција за специјални примени“. Примарно целта на Беркут е борба со организираниот криминал, но сега делува за спроведување на закон и ред за време на „масовните настани“.
Медиумите во Украина ги опишуваат Беркут како елитна полициска единица, внимателно селектирана и строго тренирана, а за прием во неа, задолжителни се отслужување војска и искуство од две до три години во спроведувањето на законот. Шансите за вработување во Беркут се поголеми доколку апликантот е спортски тип со докажано досие, пишуваат украинските медиуми.
Беркут има 4 до 5.000 членови низ Украина. Локалните единици се директно потчинети на шефовите на регионалните одделенија на Министерството за внатрешни работи, наместо окружните началници.
Не е вообичаено за единиците на Беркут да бидат пренасочени од нивната база во други региони. Сепак, според наводите, многумина од нив се донесени во Киев од источниот дел на Украина, која важи за поддржувач на претседателот Јанукович. Според наводите, членовите на оваа единица се платени два пати повеќе од обичниот полициски службеник.
Оние членови на Беркут, кој пак се ориентирани про-западно, неодамна се пожалија во медиумите дека биле „изманипулирани“ од командантите од врвот на единицата.
– Се работи за вооружени момци со гумени куршуми…се работи за специјална единица. Се зборува за зголемување на Единицата. Армијата е колеблива за вклучување во протестите, а иако Владата ги напушти плановите да се придружи кон НАТО во 2010, земјата соработуваше со НАТО пред тоа, и можеби тоа влијаеше врз некои офицери за про-западно расположение, рече во интервјуто за НОВА, Дејвид Ливингстон.
Воедно тој потврди дека народот во Киев не би се откажал во потрагата по демократија, и напомена дека „можеби чудно но со авторитарниот режим следи и доволно количина на насилство, и доколку убиете неколку луѓе, ќе ја зголемете лутината кај популацијата“.
Во меѓувреме, организациите за човекови права, Европската унија, како и некои од најголемите политички фигури во светот, ги осудија нападите на полицијата. Од ноември минатата година, Украина наликува на бојно поле.
.jpg)