Зоран Иванов
Својот втор претседателски мандат, Доналд Трамп, 47-от претседарел на САД, го почна бзо.
Неочекувано динамично.
Брзо дури и за неговите Републиканци.
Уште побрзо за неговите гласачи.
И шокантно пребрзо за европските партнери.
И сега многумина полтронисти на брзина се пресвлекуваат во Трамписти и итаат да се адаптираат на хировите на новиот светски вожд.
Дури и домашниве провладини аналитичари, провладини дипломати, провладини уредници по македонскиве национални ТВ, длабоко загазија во тешки дебати како тоа сега во овие нови Трампови околности да се позиционира државава Македонија Северна.
Или, попрецизно, колку тоа анахроно и да прозвучува, политика на што поблиску до Трамп, толку по шеф дома. Толку по суверен, по моќен владетел во својата веќе ептен немоќна Македонија.
Згора, фактот што и нашиот мал трампист, нашиот актуелен премиер, за кусо време пак ќе патувал во трамповата татковина, бил силниот аргумент наместо во ЕУ, Македонија бргу и ментално и стратегиски да се прешалтува преку барата и веќе ич да не ја шиша ЕУ. Практично, порачуваат провладините интелектуални трабанти, Македонија да ја откачи ЕУ и да се закачи за оваа сегашна политички Трампова САД.
И се’ ќе е така фино ако овдешниве наши, со нивните полтронски пориви залепени за оваа Трампова шашма политика, навреме не согледаат дека спринтот на Трамп, главно оној на тамошната домашна американска сцена, почнува да се крши прво во американскиот правен поредок кој веќе му запре, му обори, па и за ништовни му прогласи еден куп чаламџиски, а правно неиздржани одлуки и дека американската јавност, прво онаа институционалната како ФБИ од каде што, наспроти претседателските овластувања, како непринципиелен политички притисок од позиција на моќ, им побара оставки на сите тамошни шефови, тоа идентично и за началниците на ЦИА за да стаса до моќниот Пентагон кој го нападна со непроверени, со можни, но сепак паушални обвинувања за тешки корупции таму, потоа со засега спорадични негативни реакции од неговите Републиканци, па се’ до уште само никулци од реакции на најшироката американска демократска јавностна за неочекуваните тоталитарни потези на нивниот претседател.
Јавност американска е негувана таа негова позиција претседателска да е чуварот, а не ништачот на нивните демократски права и слободи.
И е научена дека тој, нивниот претседател, не е суверенист на државата туку дека е тој суверенот на либералното американсканско општество. И дека таму за каде што е избран, не е за да им биде контролор на нивните животи туку да им биде совест на нивните обврски но и на нивните граѓански прва.
И дека нивниот претседател, претседателот на САД, е тој грижлив палир на светската демократијата.
На онаа каква што до вчера современиот свет ја познаваше и на која огромното мнозинство Американци беа горди.
Граѓаните на САД се уште не се брануваат против тоталитарните манири на Доналд Трамп. Сепак, општеството на САД веќе млако занишува. Засега само како полека да отрезнува од брзите и, за слободарските САД, во добра мера шокантни антиамерикански потези на американскиот претседател.
Затоа, овдешни македонски Трампови суверенисти, забавете малку.
Држете се до оваа каква таква ЕУ и не туку трчајте толку брзо и толку посветено по хировите на Доналд Трамп.
Ќе се препнете.
И ај што ќе се препнете вие, туку ќе ја кутнете и ќе ја до урнисате и оваа наша, каква таква, па сепак се’ уште некаква и низ маки освоена македонска демоктатија.