Македонското министерство за надворешни работи досега нема одговор на барањата и реакциите од министерствата на Турција и на Бугарија на пописните резултати односно на бројноста на турската односно бугарската заедница овде. И покрај нашите обиди денеска, да добиеме нивна реакција кабинетот на министерот не посочи дали МНР ќе употреби некаков дипломатски инструмент за да возврати на соопштенијата на турското односно бугарското МНР.
Портпаролот на министерството за надворешни работи на Турција, Танџу Билгич ги повика властите во земјава да ги земат предвид забелешките на објавените пописни резултати на Националното координативно тело за пописот на турскиот народ во Република Северна Македонија.
А бугарското МНР во соопштението наведе „забележуваме драстична неусогласеност меѓу презентираните податоци и бројката од над 100.000 граѓани на Северна Македонија кои лично поднеле документи со кои се докажува бугарското потекло и самосвеста за добивање на бугарско државјанство. Ги имаме во предвид и сомнежите за транспарентноста и кредибилитетот на процесот што ги истакнаа организациите на Бугарите во Северна Македонија, како за време на пописот, така и при објавувањето на резултатите. Очекуваме нивниот глас да допре до македонските власти“, соопшти бугарското МНР.
Дали и каков одговор ќе испорача македонското МНР на овие прозивки од своите хомолози од Турција и Бугарија засега е непознато.