Со тим од 14 експерти, 20 долгорочни набљудувачи и 300 набљудувачи на краток рок од земјите членки на ОБСЕ, Мисијата на ОДИХР ќе ги набљудува претстојните парламентарни избори закажани за 11.декември, соопшти шефицата на мисијата, Тана де Зулуета.
На прес-конференција, де Зулуета информираше дека набљудувачката мисија на ОБСЕ/ОДИХР стартувала денес со средби на делегации во македонското Министерство за надворешни работи и Државната изборна комисија.
На 9.ноември ширум земјава експертите и долгорочните набљудувачи ќе бидат распространети на локално ниво, а веднаш по пристигнувањето на краткорочните 300 набљудувачи, неколку дена пред изборите, и тие ќе ги заземат своите места ширум Македонија.
– Мисијата ќе ја оценува усогласеноста на овие избори со заложбите на ОБСЕ и другите меѓународни обврски и стандарди за демократски избори, како и со домашните прописи. Набљудувачите внимателно ќе ги следат регистрацијата на кандидатите и гласачите, активностите во кампањата, работата на изборната администрација, соодветните владини институции, како и известувањето на медиумите, изјави де Зулуета меѓу другото.
На самиот ден на изборите, набљудувачите ќе го следат отворањето на гласачките места, гласањето и пребројувањето на ливчињата како и сумирањето на гласовите, а заклучокот на ОБСЕ/ОДХИР ќе го пишуваат делегации на Парламентарното собрание на ОБСЕ и Парламентарното собрание на Советот на Европа. Целосниот извештај ќе биде објавен за речиси осум седмици од изборите.
На прашањето на НОВА, кои се механизмите на ОБСЕ/ОДИХР да постапува по евентуални прекршоци за време на изборниот процес, бидејќи и во минатото извештаите на ОБСЕ/ОДИХР забележуваат нерегуларности, де Зулуета вели, тие само нотираат и објавуваат, а должноста за интервенции останува на властите.
– Ние само набљудуваме, не интервенираме. Забележуваме во извештајот и го презентираме во јавноста, но обврска на властите е да одговорат на нашите забелешки, потенцира де Зулуета.
Токму вакви слични забелешки ОБСЕ/ОДИХР имаше нотирано во извештајот кој го објави во јули годинава за изборите кои требаше да се случат на 5.јуни според Договорот од Пржино, а кои подоцна беа презакажани.
Во извештајот помеѓу другото забележано е дека избирачите биле заплашувани во комбинација со страв од одмазда од страна на државните претпријатија и институции, додека одлуката на претседателот Ѓорѓе Иванов за аболиција на 56 лица кои се под истрага или осомничени за вмешаност во скандалот со прислушкувањето само ја продолжи кризата.