Новинарот и сопственик на ПорталиХ, Фуркан Салиу е уапсен од страна на специјалната полиција (ЕБР).
Според видеото кое го објави медиумот ИН7.ТВ, се гледа како Салиу е уапсен од бројни полициски сили.
Според извор познат на ЦИВИЛ, очевидец на настанот, новинарот Фуркан Салиу реагирал при апсење на навивач за време на важниот фудбалски натпревар меѓу Коњаре и Куманово.
„При намерата на полицијата да уапси навивач на трибините, новинарот Фуркан Салиу интервенираше со повици дека немаат право да го уапсат, по што и тој е уапсен, колку што знам, за непочитување на наредбите на полицијата“, изјави изворот на ЦИВИЛ, кој сакаше да остане анонимен.
Објавените видео снимки упатуваат на прекумерна употреба на сила, што може да претставува кршење на човековите права, според ЦИВИЛ. Извори на ЦИВИЛ, исто така, упатуваат на загрижувачки факт дека новинарот Салиу е претепан од полицијата и дека бил тепан и после приведувањето во полициската станица во Гази Баба.
Во меѓувреме, ЗНМ излезе со соопштение во кое се бара итно ослободување на новинарот Фуркан Салиу.
ЦИВИЛ остро ја осуди полициската бруталност, бара итно ослободување на новинарот и итна истрага за пречекорување на полициските овластувања и полициска бруталност.
Според „Нетпрес“, пак, интернет портал кој важи за близок до ВМРО-ДПМНЕ, Салиу бил приведен откако наводно нападнал полицаец, припадник на Единицата за брзо распоредување (ЕБР). По инцидентот, полицијата извршила претрес на Салиу и на неговото возило, при што нашла еден пиштол во неговиот ранец.
Инаку, се работи за фудбалски натпревар важен за Третата фудбалска лига, каде на екипата на Куманово ѝ беа потребни бодови за влез во втората лига. Натпреварот бил претходно оценет како меч од висок ризик.
Назми Абдурахмани