Среде моќните напади на Израел врз Либан, Си-Ен-Ен ги пренесува реакциите на светските лидери за голема ескалација на насилството во кое загинаа повеќе од 500 луѓе, а илјадници беа ранети.
Кинескиот министер за надворешни работи, Ванг Ји, остро ги осуди смртоносните воздушни напади на Израел во Либан, велејќи дека тој и неговата влада „силно ги осудуваат дејствијата кои ги кршат основните норми на меѓународниот поредок“.
Портпаролот на иранското Министерство за надворешни работи, Насер Канаани, го предупреди Израел на „опасни последици“ по нападот на Либан.
Генералниот секретар на ОН, Антонио Гутереш ги повика Израел и Хезболах веднаш да ги прекинат борбите, велејќи дека Либан е на работ.
Шефот за надворешна политика на ЕУ, Жозеп Борел, рече дека бројот на жртвите на израелските напади во Либан е „алармантен“ и го повика Советот за безбедност на ОН „да го направи својот дел“.
Итно треба да го запреме патот кон војната. Двете страни мора да спроведат итен прекин на огнот, рече Борел.
Мојот тим е во постојан контакт со нашите колеги и работиме на деескалација на начин што ќе им овозможи на луѓето безбедно да се вратат во своите домови, рече американскиот претседател Џо Бајден.
Министерството за надворешни работи на Катар ги осуди воздушните напади, велејќи дека „оваа реалност ги влошува кризите, го става регионот на работ од бездната и го изложува на нови тензии кои ќе имаат големо влијание на регионално и меѓународно ниво“.
Египет објави соопштение во кое ја изразува својата солидарност со Либан и го потврдува своето „категорично отфрлање“ на какво било нарушување на суверенитетот на Либан и неговите територии.
Јордан, исто така, изрази солидарност со Либан и ги повика ОН да преземат акција.
Израел продолжува да го турка регионот кон бездната на сеопфатна регионална војна бидејќи меѓународната заедница не успеа да ги заштити своите закони и вредности, рече Ајман Сафади, министер за надворешни работи на земјата.