Платформата на граѓански организации за борба против корупцијата остро реагира на последните изјави на пратеникот Бојан Стојаноски, кој ги поврза реакциите на Платформата со политички влијанија. Платформата ја осудува ваквата интервенција, истакнувајќи дека сериозните аргументи против предложените измени на Законот за јавните набавки беа изнесени не само од неа, туку и од Државната комисија за спречување на корупцијата и Европската Унија.
Според Платформата, Стојаноски изнел лични ставови и информации против нејзините активности, со што го нарушил угледот на организациите кои во неа членуваат. Платформата, која постои повеќе од 10 години и обединува 14 исклучителни граѓански организации, нагласува дека сите одлуки се донесуваат согласно утврдени правила и процедури, а во согласност со најдобрите практики во борбата против корупцијата.
Платформата бара Собранието да го осуди ваквото однесување и да ја заштити независноста на граѓанските организации. Воедно, се истакнува дека Собранието не искористило можност за консултации со експерти, што е во спротивност со заложбите за креирање политики со активно вклучување на сите релевантни капацитети на македонското општество.
„Не треба да продолжи практиката на исклучување на експертски и граѓански организации од процесите на креирање јавни политики. Само преку отворен дијалог и партнерство меѓу граѓанското општество и институциите може да се создаде систем кој ќе одговара на потребите на сите граѓани“, изјавија од Платформата.
Платформата останува посветена на своите принципи за креирање политики преку транспарентен и консултативен процес, со акцент на професионален однос и взаемна почит.