Одлуката дали Македонија ќе добие датум за преговори ќе биде донесена на состанокот на премиери и на шефови на држави на членките на ЕУ – вели Марко Трошановски, директор на Институтот за демократија „Социетас Цивилис“ во интервју за НОВА.
Новата методологија за преговори со новите земји членки на која сега инсистира Франција е само нацрт, и допрва треба да се финализира. Трошановски вели дека Франција сака да се осигура дека реформите ќе бидат суштински и одржливи, по негативното искуство со земјите кои станаа членки во последното проширување, но напоменува дека и во актуелниот процес на преговарање има можност – земјата да се врати повторно на поглавје кое било затворено, ако во меѓувреме се утврди дека реформите запреле.
Освен долгиот процес на преговори, кој остава доволно време Унијата да се реформира, Трошановски потсетува и на уште еден услов пред приемот на нова земја во Унијата, а тоа е референдумот во Франција кој е задолжителен за секоја нова членка на Унијата.
Одлуката ќе биде компромисна, нешто како предлогот на Финска, но многу е важно да нема ново пролонгирање на датумот за преговори со Македонија, затоа што „евентуална негативна одлука ќе биде катастрофална и демотивирачка“.
Трошановски има контра аргументите за дилемите на Франција и одговара која е најверојатната од трите опции кои се во игра.