Еврокомесарот за проширување Оливер Вархеји денеска изјави дека процесот на европска интеграција на Западен Балкан мора да се забрза и посочи дека е „крајно разочаран“ што не е решено прашањето за почеток на преговорите на Скопје за членство во ЕУ.
Тој ова го изјави на форумот „ЕУ кон Балканот. Лекција од Украина: Европско проширување – заштита од војна“, на која се собраа европски претставници, министри за надворешни работи, истакнати јавни личности и политичари во бугарската престолнина Софија, пренесува бугарската агенција БТА.
Ќе доаѓам во Софија толку често колку што е потребно за да донесеме одлука во јуни оваа година, изјави Вархеји.
„За оние кои живеат во т.н Бриселскиот меур и бриселските процедури ова навистина може да биде загатка, но за другите кои не се толку блиску до Брисел – главното прашање е кога ќе почнеме да работиме на вистинско членство. Ова е големото прашање кога се во прашање Северна Македонија и Албанија. Не можам да сокријам дека сум крајно разочаран што ова прашање се уште е на дневен ред. Мислевме дека го решивме пред две години, но сега излезе дека прашањето повторно е на дневен ред, додаде Вархеји.
Тој рече и дека конфликтот во Украина покажал колку е важна европската интеграција.