Протестниот марш што вечерва почна од пред Владата, се одржа мирно и без инциденти. Учесниците прво стигнаа пред Министерството за правда каде ги поставија транспарентите „Ова е Устав“, „Ова е тоалетна хартија“, „Ова се лисици“ и „Ова е Јустицијата, знаете што следи“, а потоа продолжија кон Собранието. 
За цело време се слушаа патриотски песни и скандирања: „Оставка“, „Никогаш Северна, само Македонија“ и „Македонија“, а меѓу учесниците се претседателот на ВМРО-ДПМНЕ Христијан Мицкоски, како и пратеници, градоначалници и високи функционери од оваа партија. Присутни беа и претставници од Левица кои се поддржувачи на маршот против францускиот предлог.
Ова беше седми ден од протестот што се одржува под мотото „Ултиматум – НЕ благодарам“.
Пред собранието протестот почна со интонирање на националната химна, по што на бината се обратија неколку говорници. Прв меѓу нив беше Мартин Треневски поранешен амбасадор и член на првата експертска Влада.
Тој порача дека не било време за комодитет пред телевизор или во кафеани, повика на масовност зашто само така можело да се сруши оваа Влада, како што рече. Тој се обрати и до Францускиот претседател Макрон велејќи дека било срамно тоа што го прави и дека овие фашизоидни тенденции ги правела „длабоката држава“.
По него се обрати актерката Весна Петрушевска.
Петрушевска порача дека за македонскиот јазик не се преговара, и дека немало граѓаните да дозволат да бидат асимилирани и со сменет идентитет. Таа отворено рече дека застанува во борбата за рушење на оваа Влада и дека нема да дозволи други некои да ги редактираат учебниците и да ни кажуваат кој е Никола Карев.
Протестот помина мирно со најава дека од утре натаму ќе бидат повторно секој ден пред Владата и Собранието. (М.Т.)