„Македонија никогаш не била полоша. И во таква состојба, не треба да се гледаат тесните партиски интереси, туку да се подаде рака. Во услови на криза, треба да генерираме единство. Се чудам како премиерот пред само 100 дена се фалеше дека имал телефонски разговор со мене, за 100 дена подоцна се плаши да излезе на лидерска средба на која ќе разговараме за предвремени избори. Јас не се плашам да излезам на избори, тој бега од предвремени избори“, рече лидерот на ВМРО-ДПМНЕ, Христијан Мицкоски во гостувањетио во Дневникот на ТВ Сител.
Опозициското барање за предвремено соочување со волјата на народот од власта е одбиено со образложение дека не е време за избори, „бидејќи земјава се соочувала со предизвици“.
„Многу европски земји одржаа избори. Тоа не е оправдување. За време на ковид-19 пандемијата ги одложувавме изборите, па потоа трчаа да ги организираат“, возврати Мицкоски.
Лидерот на ВМРО-ДПМНЕ за утре најави Извршен комитет на партијата на кој ќе се разговара за чекорите по 10 мај. Притоа најави еден вид на институционална блокада, како активна блокада на македонското Собрание со исклучок на оние закони кои значат повисоки плати за граѓаните.
„Често пати, кога се движам меѓу граѓаните, наидувам на прашањето „што правите, зошто молчите“. Но, не е така. Некој активно се труди да ја наметне тезата дека сите се исти, ние активно се бориме да ја демантираме таа теза“, истакна Мицкоски.
За чекорите што партијата што ќе ги преземе во наредниот период побара општествена поддршка.
„Јас побарав општествена поддршка – и партиска и непартиска. Она што го слушаме од граѓаните се промени и имам впечаток дека таа поддршка расте експоненцијално од ден во ден“, рече претседателот на ВМРО-ДПМНЕ.
С.Д.