Министерот за внатрешни работи, Оливер Спасовски денеска во Атина оствари средба со министерот за заштита на граѓаните на Република Грција, Панајотис Теодорикакос. Како што информираат од МВР, Спасовски и Теодорикакос искажале задоволството од начинот на кој се одвива соработката меѓу двете министерства и двете соседни земји во изминативе неколку години, како на оперативно така и на политичко ниво, со уверување дека овој тренд на соработка ќе продолжи да се надградува и во иднина.
,,На средбата стана збор за теми кои се актуелни во моментот, како што е состојбата со бегалците кои пристигнуваат од Украина, како и за состојбите со илегалната миграција. Во овој период се откриени 24 случаи на криумчарење мигранти во кои е спречен обид да бидат прокриумчарени 217 лица. Бројот на откриените случаи, кривичните дела и мигрантите бележат тренд на зголемување, споредбено со истиот период претходната година”, се вели во соопштението на МВР.
Во делот на меѓународната и регионалната соработка на двете министерства, министрите ја потенцирале важноста од истата, особено во заедничката борба против организираниот криминал и тероризмот и изразиле уверување дека и натаму остануваат посветени на заедничкото дејствување во рамки на регионални и меѓународни иницијативи.
,,Министрите се согласија за продлабочување на соработката помеѓу директорите на полиции на оперативно ниво, во делот на размена на искуства при заеднички вежби и обуки за специјалните елитни единици од двете земји во борбата со организираниот криминал и трговијата со дрога”, информираат од МВР.