Европската Комисија (ЕК) денеска за првпат се изјасни за временски рок за одржувањето на првата меѓувладина конференција со С. Македонија и Албанија за време на презентацијата на извештајот на европратеникот Илхан Ќучук, јави дописничката на МИА од Брисел.
Во име на ЕК се огласи еврокомесарот Дидие Рејндерс, кој го заменуваше Оливер Вархеји попладнево во Европскиот Парламент. По воведот на известувачот за Северна Македонија, Илхан Ќучук на неговата резолуција за земјата, тој повика преговорите со С. Македонија, како и со Албанија, да започнат пред крајот на француското претседателство на 30 јуни.
„Земјите членки на ЕУ донесоа одлука во март 2020 година да ги отворат преговорите со Албанија и Северна Македонија. Сега е време да се испорача и официјално да се отворат со двете земји пред крајот на француското претседателство“, изјави еврокомесарот.
Тој додаде дека ова е најсилниот сигнал што ЕУ може да му го испрати на целиот Западен Балкан.
Пред два дена и високиот претставник за надворешна политика на ЕУ, Жосеп Борел даде временски рок кога треба да започнат преговорите со Северна Македонија и предупреди дека доколку тоа не се случи до крајот на француското претседателство ќе се отвори сериозен проблем помеѓу ЕУ и целиот регион.
Европската Комисија досега никогаш не се изјаснуваше за рокови во однос на отпочнувањето на преговорите со Скопје и Тирана, користејќи го изразот „што е можно поскоро“.
Од ЕК изразуваат подготвеност да помогнат во изнаоѓање на решение за надминување на спорот помеѓу С. Македонија и Бугарија.
Известувачот Ќучук од своја страна предупреди дека „времето не е на ничија страна“ во овој спор.
„Ова е губитничка ситуација за Бугарија, за Северна Македонија и за ЕУ“, порача известувачот и ги повика Скопје и Софија да најдат заеднички прифатливо решение за да може да се одржи првата меѓувладина конференција, со што ќе им се даде перспектива на македонските граѓани.
Одолговлекувањето на почетокот на преговорите со Северна Македонија, според Ќучук има негативно влијание и врз геополитичкиот контекст. Тој додаде дека ова се историски времиња кои бараат лидерски одлуки, а не следење на јавното мислење.
Извештајот на Ќучук го поздравува реформскиот напредок во земјата, со низа забелешки, меѓу другото, за состојбата со медиумите, цивилното општество, изборниот законик. Најспорно во извештајот се поднесените амандмани во врска со спорот со Бугарија. Извештајот и амандманите ќе се усвојуваат утре попладне во Брисел.