Затворено писмо до третпат новоизбраниот градоначелник на Центар
Здраво Жерновски.
Јас сум, јас сум… да, бе да. Баш сега те гледам, те избрале пак. Тоа е убаво, така и си мислев, ама… имам замерка. Што го влечеш оној Би Си со тебе, што се бламираш… мислиш не може да има и четврт круг? Тој не е многу омилен, знаеш. Па уште се развикале: Андреј! Андреј! Бранко! Бранко! Ти си Жерновски, не си Бранко? Друго, па нели цел ден по медиумиве трубат дека има нерегуларности? И ќе кажат овие откај Бакалот што се: Оп, како за нив – така и за нас. Нерегуларности – нерегуларности. Пу-пу не важи. Прашај ги „Цивил“. Тие најдоа 300 незаконити работи. Толку за тоа.
Сега, со Тодоровиќ, немој да се мразите… било што било… гледај да правиш муабет со него, и да си викате „Добро утро… добар ден“. Не е толку тешко. И, мора да го прашаш една работа, оти тој знае, а ти не знаеш. Прашај го да ти каже, каде спие оној инфантилниот Џин, што му ставија толку играчки на плоштад да си игра… најди го, дај му да си избере кои фигури му се најубави, што сака нека си земе, и од оние што се прават спакувај му, и испрати го негде во странство… нека прават таму детска соба или дворче за џинот, нам ни е доста. А вртелешката нека остане. Мала му е и онака.
Така. Толку за денес.
Ај, остани со здравје. Ако има четврт круг – пак ќе ти пишам.
Поздрав, Тихомир.
п.с. строго забрането да се објавува на кој и да е од порталите.
Почитуван сограѓанину, и почитувана сограѓанке:
Имајќи ги предвид новопоставените споменици, како и тенденцијата кон споменичарство која во метрополата и натаму расте, и со оглед на новите општествени потреби како и на новиот блескав и победнички дух на времето во кое живееме, на мнение сум монументално, да се отворат нови факултети, како и отсеци на веќе постоечките, со следниве предмети: 1) Производство на бронза, 2) Вајарство и 3) Леење. Таму е иднината. Не давај времето да те прегази! Постои голем, огромен недостиг од овие кадри, бидејќи петогодишниот план предвидува ширење на оваа „слатка зараза“ од Скопје во другите градови ширум републиката, но и во соседните земји. Порачки веќе пристигнуваат од Белград, Софија, Тирана и Атина. Еднаш нешто да започне и од тука. Се предвидува „бронзената треска“ наскоро да ги напушти границите на матичната држава, и да ја освои и цела Европа, а набрзо потоа и планетата. Преиспитајте се и пријавете се. MАКЕДОНИЈА МОЖЕ! МОЖЕШ И ТИ! БИДИ ВАЈАР! БИДИ МАКЕДОНИЈА!