Се чини последното интензивирање на односите и контактите со официјална Софија го „помрдна“ и процесот за назначување на наш дипломатски претставник во Бугарија.
Владата во затворениот дел на вчерашната седница, а како што пренесоа повеќе медиуми, ја предложила шефицата на македонската мисија при ЕУ во Брисел од 2018 година, дипломатката од кариера Агнеса Руси за амбасадор во Република Бугарија.
Според процедурата предлогот треба да го помине собранискиот филтер, Комисијата за надворешни работи, по што шефот на државата го доделува агреманот. Обврската за настап пред собраниската комисија не е задолжителна но е веќе востановена пракса која помалку или повеќе се почитува од сите досега номинирани амбасадори на земјава во светот.
Република Северна Македонија околу две години нема амбасадор во Бугарија, нешто што предизвикуваше негативни реакции од страна на бугарските државни претставници кои го толкуваа како отсуство на интерес од наша страна, за континуирано развивање добри и силни меѓудржавни односи.
Последен амбасадор на земјава во Бугарија беше Марјан Ѓорчев.