Актерката Силвија Стојановска денеска во Кривичниот суд доби ослободителна пресуда по обвинението за шверц на кокаин.
Апелацискиот суд претходно донесе одлука да го врати предметот на повторно судење, откако актерката Стојановска со првостепена пресуда беше осудена на три и пол години затвор за делото што ѝ се ставаше на товар – шверц на 700 килограми кокаин од Колумбија во Шпанија.
Првообвинетиот Воислав Будисављевиќ, пак, кој беше првостепено осуден на седум години затвор, поднесе жалба, но наместо ослободување или враќање на судењето отпочеток како што бараше, Апелацискиот суд му ја зголеми казната на 12 години затвор.
Актерката се гонеше за делото 215 од Кривичниот законик со кое се казнува неовластено производство, продавање или продажба, држење и транспорт на наркотични дроги. Таа беше обвинета по ставот 3 кој вели дека ако делото го извршиле повеќе лица или сторителот на делото организирал мрежа на продавачи и посредници, ќе се казни со затвор од една од пет години.
Меѓутоа, како што објаснија од судот, во повтореното судење се следеле напатствијата од Апелација, се анализирале докази и од нив не се гледа мрежата односно учеството на актерката во неа.
„Овој судечки совет смета дека јавниот обвинител не докажал надвор од разумно сомнение дека таа го сторила делото“, рече судијата Огнен Ставрев.
Основното јавно обвинителство за гонење организиран криминал и корупција обвинението за овој случај го поднесе на 12 јуни 2020 година откако претходно беше отворена истрага во рамки на меѓународната операција под кодно име „Колибри“ во која апсења на три лица имаше и во Шпанија. Еден од нив беше братот на Будисављевиќ.
Обвинение против актерката Силвија Стојановска за меѓународна трговија со кокаин
Со обвинението за Стојановска и нејзиниот тогашен партнер, обвинителството тврдеше дека утврдило оти во втората половина на 2019 година тие учествувале во купување, пренесување и препродавање на кокаин во количина од речиси 700 килограми.