„Јас сум единствениот претседател во Србија кој победил два пати и тоа во првиот круг“, рече Александар Вучиќ во емотивен говор само неколку часа по завршување на изборите во Србија.
Тој вели дека на тројните избори во Србија, редовни претседателски и вонредни парламентарни и локални, гласале рекорден број на избирачи – 3.840.000.
„Ние имаме покомплетен увид во резултатите, ги имаме резултатите од дијаспората и резултатите од гласачите на Косово и Метохија. Можам да кажам дека се помина во најдобар ред и мир. Задоволен сум што гласачите излегоа во толку голем број“, рече Вучиќ и додаде дека на претседателските избори добил 59,9 проценти од гласовите од обработени над 85 отсто од избирачките места.
Неговиот најсериозен против кандидат, поранашниот генерал Здравко Понош освоил 17,7 гласови, по што следат Милош Јовановиќ со 5,9 отсто, Милица Ѓурѓевиќ Стаменковски со 4,5 проценти, па Бошко Обрадовиќ со 4,4 отсто.
За Александар Вучиќ гласале 2.250.000 гласачи, што според него е историски број на гласови дадени за еден претседателски кандидат во првиот круг од изборите.
„Во однос на парламентарните избори, нашата листа ‘Заедно можеме се’ освои 44 отсто од гласовите. Според нашите пресметки тоа се 125 мандати во Парламентот што значи дека можеме да формираме самостојна Влада со Советот на Унгарците од Војводина бидејќи со нив имаме најблиски односи“, рече Вучиќ.
Тој вели дека за Србија е најважно да има добри односи во регионот, да го продолжи својот пат кон ЕУ, но и да ги задржи добрите врски со традиционалните пријатели.